Noyabr ayında Tehranda "Şimal-Cənub" nəqliyyat dəhlizi layihəsi üzrə Azərbaycan, Rusiya və Qazaxıstanın dəmir yol administrasiya nümayəndələrinin üçtərəfli görüşü keçiriləcək. Trend xəbər verir ki, bu barədə bu gün Azərbaycan Dövlət Dəmir Yolu idarəsinin rəisi Arif Əsgərov məlumat verib.
Onun sözlərinə görə, görüşdə nəqliyyat dəhlizinin gələcək inkişafının, həmçinin layihənin reallaşdırılması ilə bağlı bir sıra texniki məsələlərin müzakirəsi nəzərdə tutulub.
Hazırda tərəflər Xəzər dənizinin qərb sahili boyu birbaşa quru nəqliyyatının formalaşdırılması haqqında məsələni həll edirlər. Bu, Avropadan Hindistana ən qısa nəqliyyat marşrutunun: Azərbaycan və Rusiyanın dəmir yollarına çıxışla İran ərazisində yeni Qəzvin-Rəşt-Astara xəttinin tikintisini nəzərdə tutur.
İndi Rəşt-Qəzvin dəmir yol qolunun tikintisi aparılır. Yaxın vaxtlarda Astara _reşt qolunun tikintisi başlayacaq. "Şimal-Cənub" nəqliyyat dəhlizi layihəsi Rusiya, Azərbaycan, və İrandan keçməklə Avropadan Hindistana və Cənub-Şərqi Asiya ölkələrinə vahid dəmiryol nəqliyyatının yaradılmasını nəzərdə tutur. Layihənin reallaşdırılmasına 400 mln. ABŞ dollarından artıq vəsait tələb olunur, həm də işlərin çox hissəsi Azərbaycanla sərhədə qədər dəmiryol nəqliyyatı olmayan İranda görüləcək. 20 mln. ABŞ dolları həcmində müəyyən işlər Azərbaycanda görülməlidir.
Azərbaycanın nəqliyyat ekspertləri qeyd edir ki, Azərbaycan həmin layihəni reallaşdırmağa tələsməməlidir. Respublikada görülməsi nəzərdə tutulan işlərin həcmi böyük deyil. Astara (AR) stansiyasına qədər təxminən 7,5 km uzunluğunda yol çəkmək, təkər cütlərinin dəyişdirilməsi sistemi olan stansiya, sərhəd və gömrük infrastrukturu inşa etmək lazımdır. Həmçinin sərhəd dəmiryol körpüsü tikmək lazımdır. Lakin bu layihə İranla paritet əsasda reallaşdırılacaq.
