Əmək və Əhalinin Sosial Müdafiəsi Nazirliyinin son məlumatına əsasən, 2007-ci ildə ünvanlı dövlət sosial yardımı 171 min ailəyə və ya 800 mindən çox insana şamil olunacaq. Maliyyə Nazirliyindən Trend ə verilən məlumata görə, 2007-ci ilin dövlət büdcəsində bu məqsədlər üçün 78 mln. manat nəzərdə tutulub.
Əmək Nazirliyinin proqnozlarına görə, 2006-cı ildə ünvanlı sosial yardımı 50 min ailə (250 min insan) alacaq. Adam başına orta hesabla 10-11 manat səviyyəsində ünvanlı yardım düşür. 2006-cı ilin iyulun 1-dən verilən ünvanlı dövlət sosial yardımı almaq üçün Nazirlər Kabinetinin qərarı ilə "ehtiyac kriteriyası" 30 manat (150 min köhnə manatla) müəyyən olunub. Hal-hazırda ehtiyac kriteriyasının 2007-ci ildən 35 və ya 40 manata qədər qaldırılmasının iki variantı nəzərdən keçirilir.
Ünvanlı sosial yardımın verilməsi üçün 2006-cı il dövlət büdcəsindən 72 mln. manat ayrılıb. Yardım yarım il ərzində veriləcəyindən büdcə vəsaitlərinə qənaət oluna bilər.