Hazırda Bakıda keçirilən ikigünlük beynəlxalq investisiya konfransının yekunları üzrə Azərbaycan və İslam İnkişaf Bankı (İİB) dövlət zəmanəti olmadan maliyyələşdiriləcək bir neçə investisiya layihəsini razılaşdırmağı planlaşdırırlar. Trend xəbər verir ki, bu barədə bu gün jurnalistlərə Azərbaycanın iqtisadi inkişaf naziri Heydər Babayev məlumat verib.
Onun sözlərinə görə, Azərbaycan iqtisadiyyatının İİB-i maraqlandıran sektorlarından biri - inşaatdır.
"Bu, ölkə iqtisadiyyatı üçün çox vacibdir. İİB bizim üçün strateji tərəfdaşdır", - deyə Heydər Babayev bildirib.
İslam İnkişaf Bankının prezidenti Əhməd Məhəmməd Əlinin sözlərinə görə, Azərbaycan tərəfi hər hansı layihənin maliyyələşdirilməsinə qədər tədqiqat aparmağı təklif edib. "Bununla bağlı Azərbaycanda regional tədqiqat mərkəzinin yaradılması planlaşdırılır", - deyə o bildirib.
Azərbaycanın iqtisadi inkişaf naziri bildirib ki, bu məsələlərin dəqiqləşdirilməsi üçün İİB missiyasının Bakıya səfəri gözlənilir.
