Azərbaycan, Bakı, 01 avqust/ Trend / Azərbaycanın şimalında 330 kilovoltluq "Xaçmaz" yarımstansiyasının tikintisinə dair tenderin qalibi olmuş Çinn CNEEC şirkəti 180 MV/A gücündə transformatorları sınaqdan keçirir. Bu barədə "Azərenerj" SC-nin cümə günü yayılan məlumatında bildirilir.
Bundan əlavə, yarımstansiyada 630 KV/A gücündə transformatorlar quraşdırılacaq.
Ötən il "Azərenerj" Səhmdar Cəmiyyəti Çinin CNEEC şirkəti ilə yeni yarımstansiyanın tikintisinə dair təqribən $16 mln. dəyərində müqavilə imzalayıb. Tender proseduru məsləhətçi - "Dar əl-həndəsə" ərəb konsaltinq şirkəti ilə birlikdə aparılıb.
Xaçmaz rayonunda müasir 330 kilovoltluq yarımstansiyanın tikintisi "2004-2008-ci illərdə regionların sosial-iqtisadi inkişafı Dövlət Proqramı" və "2005-2015-ci illərdə yanacaq-energetika kompleksinin inkişafı üzrə Dövlət Proqramı"na daxil edilib. İİB layihənin reallaşdırılmasına illik altı faiz dərəcə ilə 12 il müddətinə $13,508 mln. kredit ayırıb.
"Xaçmaz" yarımstansiyası enerji sisteminin manevrliliyinin artırılması baxımından böyük əhəmiyyət kəsb edir. O, Rusiya ilə elektrik enerjisi mübadiləsinin aparıldığı Yaşma-Dərbənd EÖX-dən qidalanacaq.
Hazırda belə stansiya olmadığı üçün Yaşmada RF-dən elektrik enerjisi alan "Azərenerj" onu şimal regionlarının elektrik təchizatının təmin edilməsi üçün yenidən sərhədə nəql etməyə məcburdur. Perspektivdə regionda paylayıcı funksiyanı yeni yarımstansiyanın üzərinə qoymaq nəzərdə tutulur. Qalan həcm isə Bakının təchizatı üçün göndəriləcək.