Azərbaycan, Bakı, 20 sentyabr/ Trend , müxbir E.İsmayılov/ "Gələn il Azərbaycanın Dövlət Neft Şirkəti (ARDNŞ) yeraltı qaz anbarlarına 2 mlrd. kubmetrdən çox qaz vuracaq", - ARDNŞ - nin prezidenti Rövnəq Abdullayev bildirib.
Cari ilin noyabrında ARDNŞ Qaradağdakı qaz anbarının genişləndirilməsi üçün zəruri olan Rusiya istehsalı kompressorlar alacaq. Kompressorlar 2009 - cu ildə qaz anbarına vurulan ümumi həcmi artırmağa imkan verəcək. Təmir işləri xeyli müddətdir ki, başlayıb və artıq təxminən 20 quyu təmir edilib, quyulara aparan bütün qaz kəmərləri yenidən qurulub, kompressor stansiyası quraşdırılır.
Qaz anbarlarının təmiri iki mərhələdən ibarətdir. Birinci mərhələdə anbarlara 2 mlrd. kubmetrdən çox qazın vurulması nəzərdə tutulur. İkinci mərhələdə vurulan qazın həcmini 5 mlrd. kubmetrədək artırmaq mümkün olacaq. İşlərin ümumi dəyəri təxminən 100 mln. manatdır.
Hazırda Azərbaycanda iki qaz anbarı istismar edilir - "Qaradağ" və "Qalmaz".
2008 - ci ildə qaz anbarlarına 1,4 mlrd. kubmetrdən çox qaz vurulacaq. Ötən il qaz anbarlarına 1 mlrd. kubmetrdən çox qaz vurulub. Bu qaz həcmindən 2007-2008 - ci illərin payız- qış dövründə abunəçilərin təminatı üçün istifadə edilib.
Azərbaycanın Dövlət Neft Şirkəti anbarlara vurulan qazı şəxsi vəsaitləri hesabına müstəqil işlədiyi yataqlardan hasil edir. ARDNŞ cari il ərzində 8 mlrd. kubmetr qaz hasil etmək niyyətindədir. Azərbaycan "Azəri - Çıraq - Günəşli" yataqlarından təxminən 1,4 mlrd. kubmetr, "Şahdəniz" qaz-kondensat yatağından isə, 2,9 mlrd. kubmetr qaz alacaq.
Müəlliflə əlaqə saxlamaq üçün elektron ünvan: [email protected]