...

SOCAR Xəzər dənizindəki iri yataqda neft hasilatı səviyyəsinin dəstəklənməsi üçün fəal iş aparır

Energetika Materials 4 Fevral 2009 15:44 (UTC +04:00)

Azərbaycan, Bakı, 04 fevral/ Trend , müxbir E.İsmayılov/ Heydər Əliyev adına dərin özüllər zavodu ilin ortalarınadək SOCAR tərəfindən müstəqil şəkildə istismar edilən "Neft Daşları" dəniz yatağı üçün yeni "Neft Daşları - 2585" dörd bloklu platformanın iki blokunun tikintisini başa çatdıracaq. Bu barədə çərşənbə günü SOCAR şirkətində işlərə yaxın mənbə bildirib.

"Tikinti işləri aparılır, blokların tikintisinin ilin ortalarınadək başa çatdırılması planlaşdırılır", - deyə mənbə bildirib. Blokların hündürlüyü 64 metr təşkil edəcək.

Onun sözlərinə görə, platformanın üst tikililərinin inşasına dair hələ ki, sifariş daxil olmayıb. 

SOCAR-dan əvvəllər verilən məlumata görə, qalan iki blokun tikintisini Zığda yerləşən tikinti-quraşdırma meydançasında "Neftqaztikinti" Tresti həyata keçirəcək.

Dəniz şəraitində yeni platformanın istifadə müddəti 50 ildir. Yeni platforma suyun 46 metr dərinliyində, beşbloklu "Neft Daşları- 1887" platformasının 500 metrliyində yerləşəcək. SOCAR-dan əvvəllər verilən məlumatda bildirilir ki, yeni platformada 12 quyunun qazılması planlaşdırılır. 

Yaxın vaxtlarda "Nenft Daşları-2521" ikibloklu platformanın yatağa göndərilməsi gözlənilir. "Platformanın hər iki bloku, həmçinin platformanın üst tikililəri artıq hazırdır və yaxın vaxtlarda təyin olunan yerə göndəriləcək", - deyə mənbə bildirib.

On iki quyunun qazılması nəzərdə tutulan platforma bloklarının hündürlüyü 27 metr təşkil edir.

"Tikinti davam etdirilir, ay ərzində tikinti işlərinin başa çatdırılması nəzərdə tutulub", - deyə zavoddan bildiriblər.

Bu tədbirlər Azərbaycan Respublikası prezidentinin "Neft Daşları" Neft-Qaz  Çıxarma İdarəsində hasilat həcminin 812 min tondan 1,2 mln. tonadək atrırılmasına dair sərəncamı çərçivəsində həyata keçirilir.

SOCAR geoloqlarının qiymətləndirmələrinə görə, "Neft Daşları" yatağında neft ehtiyatlarının həcmi 30 milyon təşkil edir. SOCAR yataqda neft hasilatının artırılması üçün 2010-cu ilədək daha 78 yeni quyu qazacaq. Yeni platformalar ilk növbədə ehtiyatları əhəmiyyətli dərəcədə  işlənən yataqlarda stabil neft hasilatı həcminin dəstəklənməsi üçün lazımdır.

Məqalə müəllifi ilə əlaqə ünvanı -  [email protected]

Xəbər lenti

Xəbər lenti