Azərbaycan, Bakı, 19 mart / Trend , müxbir E. İsmatılov /
Azərbaycan Dövlət Neft Şirkətinin eks-prezidenti Sabit Bağırov hesab edir ki, "Nabukko" qaz kəmərinin tikintisi layihəsinin ayrıca olaraq Avropa İttifaqının sərf olunmamış büdcə vəsaitləri hesabına maliyyələşdirilən layihələri siyahısından çıxarılması bu layihənin aktual olmaması demək deyil.
"Düşünürəm ki, bunu gözləmək olardı, çünki ticarət layihəsinə büdcədən qrantın ayrılması elə də gözlənilmirdi. Lakin bu o demək deyil ki, "Nabukko" gündəlikdən çıxarılıb", - Sahibkarlığın və Bazar İqtisadiyyatının İnkişafına Yardım Fondunun sabiq rəhbəri Bağırov bildirib.
Bağırovun sözlərinə görə, Budapeştdə yanvar ayında qəbul edilmiş bəyannaməyə əsasən, "Nabukko" Avropa İttifaqının böyük əhəmiyyət verdiyi layihələrdən biridir. "Nabukko" may ayında Sofiya və Praqada keçiriləcək sammitlərin gündəliyində olacaq. Həmçinin, bu ilin birinci yarısında Türkiyədə bu layihə ilə əlaqədar hökumətlərarası müqavilənin imzalanması nəzərdə tutulub.
Dəyəri 7,9 mlrd. avro (10,1 milyard dollar) olan "Nabukko" qaz kəməri layihəsi qazın Azərbaycan və Mərkəzi Asiyadan Avropa ölkələrinə nəqlini nəzərdə tutur. Qaz kəmərinin tikintisinə başlamaq 2011-ci ildə nəzərdə tutulub. Boru kəməri ilə ilk tədarüklər 2014-cü ildə başlanacaq. Boru kəmərinin maksimal ötürmə gücü ildə 31 mlrd. kubmetr olacaq. Layihənin iştirakçıları OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botas və Almaniyanın RWE şirkətləridir. Onların hər biri bərabər paya - 16,67 faiz paya malikdir.
Layihənin ümumi dəyərinin 30%-i Nabucco Gas Pipeline International-ın səmdarları tərəfindən pay hissəsi əsasında maliyələşdiriləcək. Qalan 70% isə kreditlər hesabına ödəniləcək.
Məqalə müəllifi ilə əlaqə ünvanı: [email protected]
