Azərbaycan, Bakı, 01 may / Trend /
Hazırda Bakı-Tbilisi-Ceyhan neft kəməri ilə sutkada 800 min barel neft nəql olunur. Bu barədə Azərbaycanın neft sənayesindəki mənbə bildirib.
Xəzərin Azərbaycan sektorunda yerləşən "Azəri" yatağının mərkəzi hissəsində hasilat dayandırıldıqdan sonra bu neft kəməri ilə neft nəqli sutkada 600 min barelə endirildi. Lakin hazırda platformada hasilat əvvəlki rejimdə bərpa olunub və boru kəməri ilə neft nəqli artırılıb.
Mənbə bildirib ki, Bakı-Supsa boru kəməri ilə sutkada 100 min bareldən çox neft nəql olunur. Bu boru kəməri təqribən iki il ərzində təmirə dayandırılmışdı. Lakin ötən ilin sonundan bu marşrut üzrə neft nəqli bərpa olundu.
Bu boru kəmərləri ilə nəql olunan neft "Azəri-Çıraq-Günəşli" yataqları blokundan hasil edilir. Yataqlarda sutkalıq neft hasilatı təqribən 900 min barel təşkil edir. Bakı-Tbilisi-Ceyhan boru kəməri ilə nəql olunan neftin bir hissəsi - təqribən 40 min barreli Qazaxıstanın "Tengiz" yatağından (operator Chevron) hasil etdiyi neftin payına düşür.
BTC-nin tikintisi 4 mlrd. dollara başa gəlib. Tikinti işləri, boru kəmərinin doldurulması, maliyyə xərcləri və bank faizlərinin ödənilməsi bu xərclərə daxil deyil. Maliyyə kreditinin ümumi məbləği 2,6 mlrd. təşkil edir.
BTC Co-nun səhmdarları: BP (30,1 faiz); AzBTC (25 faiz); Chevron (8,9 faiz); StatoilHydro (8,71 faiz); TRAO (6,53 faiz); Eni (5 faiz); Total (5 faiz); Itochu (3,40 faiz); Inpex (2,5 faiz); ConocoPhillips (2,50 faiz) və Hess (2,36 faiz).
Bakı-Supsa boru kəmərinin operatoru "Azəri-Çıraq-Günəşli" yataqlarının işlənməsi üzrə iştirakçıların daxil olduğu Azəbaycan Beynəlxalq Əməliyyat Şirkətidir.
Məqalə müəllifi ilə əlaqə ünvanı: [email protected]
