Azərbaycan, Bakı, 15 fevral / Trend /
ARDNŞ-yə (Azərbaycan Respublikası Dövlət Neft Şirkəti) məxsus 2085 avtomobil 2009-cu ildə şirkətin üç yoxlama məntəqəsində ekoloji baxışdan keçib. Bu barədə bazar ertəsi ARDNŞ-nin Ekologiya İdarəsinin məlumatında deyilir.
2006-2011-ci illərdə Azərbaycanda ekoloji vəziyyətin yaxşılaşdırması üzrə tədbirlər kompleksi planına müvafiq olaraq, 2009-cu ildə ARDNŞ üç ekoloji yoxlama-ölçmə məntəqəsi yaradıb. Bu məntəqələrin yaradılmasında məqsəd avtomobillərin atmosferə buraxdığı zəhərli qazların həcmini qiymətləndirmək və avtomobillərin texniki vəziyyətinin yoxlanılmasını gücləndirməkdir.
Yoxlama-ölçmə məntəqələri Bakının Səbail, Sabunçu və Suraxanı rayonlarında yerləşir.