Azərbaycan, Bakı, 25 iyun /Trend, müxbir E.İsmayılov/
Azərbaycan Respublikası Dövlət Neft Şirkəti (ARDNŞ) Xəzər dənizinin Azərbaycan sektorunda yerləşən "8 Mart" dəniz yatağındakı yüksəkdebitli istismar quyusunun qazılmasını cari ilin sonuna, növbəti ilin əvvəlinə başa çatdıracaq. Bu barədə cümə günü ARDNŞ-dəki mənbə deyib.
"Quyunun qazılması ən pis halda cari ilin sonuna yekunlaşacaq, lakin onun istismara verilməsi növbəti ilin əvvəlinə təsadüf edəcək", - mənbə bildirib.
Mənbənin sözlərinə görə, hazırda quyunun dərinliyi 3100 metrdir. Elə bu dərinliyə də kolon buraxılıb. Quyunun layihə üzrə dərinliyi 5800 metr təşkil edəcək.
Hazırda "8 Mart" yatağında sutkada 400 min kubmetrdən çox qaz hasil edilir. Şirkətin geoloqları gələcək qazma üçün doqquz nöqtəni müəyyənləşdiriblər. Bu barədə ARDNŞ-nin məlumatında deyilir.
Azərbaycanda 59 neft-qaz yatağı var. Onlardan 18-i dənizdə, qalanı isə quruda yerləşir.
