Azərbaycan, Bakı, 6 iyul /Trend, müxbir E.İsmayılov/
İyulun 6-na olan məlumata görə, 2006-cı il iyun ayının 2-dən hazırkı dövrədək "Botas International Limited (BIL)" Ceyhan neft terminalından Bakı-Tbilis-Ceyhan boru kəməri vasitəsilə daxil olan neftdən 1200 neft tankeri boşaldılıb. Bu barədə BİL-in rəsmi İnternet saytında yerləşdirilən məlumatında deyilir.
BIL əvvəlcədən Türkiyənin dövlət boru kəməri şirkəti "Botas" tərəfindən xarici şirkətlərlə əməkdaşlıq üçün yaradılıb. 2001-ci ildə BIL BTC tərəfindən istismar edilmə məqsədilə yenidən təşkil olunub.
Məlumatda qeyd olunur ki, bu müddətdə tankerlərə yüklənən neftin həcmi 942 milyon barel təşkil edib.
BTC neft kəmərinin ümumi uzunluğu 1 768 km-dir. Bunun 443-ü Azərbaycan, 249-u Gürcüstan, 1 076 km-i isə Türkiyə ərazisindən keçir. Boru kəmərinin tikintisi 2003-cü ilin aprelində, onun neftlə doldurulması isə 2005-ci il mayın 18-də başlayıb.
"BTC Co"nun səhmdarları bunlardır: bp (30,1 faiz); AzBTC (25 faiz); "Chevron" (8,90 faiz); "Statoil" (8,71 faiz); ТРАО (6,53 faiz); "Eni" (5 faiz); "Total" (5 faiz); "İtochu" (3,40 faiz); "İnpex" (2,50 faiz); "ConocoPhillips" (2,50 faiz) və "Amerada Hess" (2,36 faiz).