Azərbaycan, Bakı, 19 iyul /Trend/
İyulun 19-na olan məlumata görə, 2006-cı il iyunun 2-dən indiyədək "Botas International Limited" (BIL) şirkətinə məxsus Ceyhan neft termilandan Bakı-Tbilisi-Ceyhan (BTC) neft kəməri ilə daxil olan neft 1212 tankerə doldurulub. BIL-in rəsmi saytında yerləşdirilmiş məlumatda deyilir.
Məlumatda deyildiyi kimi, bu müddətdə tankerlərə doldurulan neftin həcmi 952 milyon barel təşkil edir.
BIL Türkiyənin "Botaş" dövlət neft şirkəti tərəfindən xarici şirkətlərlə əməkdaşlığın nizamlanması üçün yaradılıb. 2001-ci ildə BTC-nin istismarı məqsədilə yenidən təşkil olunub.
BTC neft kəmərinin ümumi uzunluğu 1768 km təşkil edir. Bunun 443 km-i Azərbaycan, 249 km-i Gürcüstan, 1076 km-i isə Türkiyə ərazisindən keçir.
Boru kəmərinin tikintisinə 2003-cü ilin mayında, onun neftlə doldurulmasına isə 2005-ci il mayın 18-də başlanılıb.
"BTC Co"nun səhmdarları bunlardır: bp (30,1 faiz); AzBTC (25 faiz); "Chevron" (8,90 faiz); "Statoil" (8,71 faiz); ТРАО (6,53 faiz); "Eni" (5 faiz); "Total" (5 faiz); "Itochu" (3,40 faiz); "Inpex" (2,50 faiz); "ConocoPhillips" (2,50 faiz) və "Amerada Hess" (2,36 faiz).
