"İnterqaz Mərkəzi Asiya" SC qaz nəqlini 11% artırıb
Azərbaycan, Bakı, 26 iyul /Trend, müxbir S.Süleymanov/
İlin birinci yarısında "İnterqaz Mərkəzi Asiya" SC-nin magistral qaz kəməri ilə nəql etdiyi qazın ümumi həcmləri 51,683 milyard kubmetr təşkil edib. Bu barədə şirkətin mətbuat xidmətinin məlumatında deyilir.
"İlin birinci yarısında "İnterqaz Mərkəzi Asiya" SC-nin magistral qaz kəməri ilə nəql etdiyi qazın ümumi həcmləri 51,683 milyard kubmetr, o cümlədən, nəqlin daxili həcmi 4,647 milyard kubmetr, beynəlxalq qaz nəqli 41,234 milyard kubmetr, ixrac daşımalarının həcmi isə 5,801 milyard kubmetr təşkil edib", - məlumatda deyilir.
Məlumata görə, 2009-cu ilin analoji dövürü ilə müqayisədə ümumi həcm 111 faiz təşkil edib. 2010-cu il üzrə planda ötən il olduğu kimi, 94 milyard kubmetr nəzərdə tutulub.
"2010-cu ilin birinci yarısında "İnterqaz Mərkəzi Asiya" SC-nin öz vəsaitləri hesabına kapital qoyuluşları 9 654,9 milyon tenge ($1- 147, 7), eləcə də istehsal - 8 525,7 milyon tenge təşkil edib. 2009-cu ilin analoji dövrü ilə müqayisədə artım 4 070,6 milyon tenge və ya 72 faiz olub", - məlumatda deyilir.
Şirkətin məlumatına görə, 2010-cu ildə "İnterqaz Mərkəzi Asiya" SC-nin öz vəsaitləri hesabına kapital qoyuluşlarının həcmi 40 112, 3 milyon tenge məbləğində nəzərdə tutulub.
"İnterqaz Mərkəzi Asiya" SC 1997-ci ilin iyununda yaradılıb. Şirkət onun konsessiyasına verilən Qazaxıstanın qaz nəqliyyat sisteminin idarəçiliyini bilavasitə həyata keçirir və "Kaztransqaz" SC ("Kazmunayqaz" MŞ SC-nin törəməsi) şirkətlər qrupuna daxildir. Struktur ölkədə illik buraxılış qabiliyyəti 190 milyard kubmetr qaz olan, uzunluğu 11 min kilometrdən artıq nəqliyyat qaz kəmərlərinin əsas şəbəkəsinə nəzarət edir.
