Azərbaycan, Bakı, 11 avqust /Trend, müxbir E.İsmayılov/
ARDNŞ cari ilin noyabrında "Günəşli-4" platformasında qazkompressor stansiyasını Xəzərin Azərbaycan sektorunda eyniadlı dəniz yatağında istismara verməyi planlaşdırıb. Bu barədə çərşənbə günü ARDNŞ-dakı mənbə bildirib. Bundan əvvəl stansiyanın sentyabrda istismara verilməsi nəzərdə tutulmuşdu.
Yeni stansiyanın quraşdırılması yataqdan sutkada 400 min kubmetr həcmdə atmosferə buraxılan aşağıtəzyiqli səmt qazının yığılması məqsədilə həyata keçirilir.
"Stansiyanın sentyabrda işə düşməsi nəzərdə tutulmuşdu, lakin bu layihə çərçivəsində işin həcmi böyükdür", - mənbə bilidirib.
Onun sözlərinə görə, hazırda tamamlayıcı tikinti və stansiyanın işə salınması işləri görülür. Proses bütünlüklə bu ilin noyabr ayına başa çata bilər.
"Günəşli" yatağı "28 May" Neft-Qazçıxarma İdarəsinin balansındadır.
Əvvəllər infrastrukturun olmaması səbəbindən bu qaz atmosferə buraxılıb. Bu da öz növbəsində, ətraf mühitə ciddi ziyan vurub. Lazımi infrastrukturun yaradılması və bu layihənin həyata keçirilmə dəyəri 150 milyon dollardır. Tullantıların həcmi ildə 150-250 milyon kubmetr arasında dəyişir.
