Azərbaycan, Bakı, 20 avqust /Trend, müxbir E.İsmayılov/
Sentyabrda Türkiyənin "Tekfen Construction" şirkəti Bakıda ARDNŞ üçün yeni inzibati binanın tikintisinə başlamağı planlaşdırıb. Bu barədə cümə günü şirkətdəki mənbə deyib.
Onun sözlərinə görə, hazırda tikinti işlərinə başlamaq üçün səfərbərlik işi aparılır.
"İndi tikintiyə başlamaq üçün güclər səfərbər edilir. İşlərin artıq sentyabrda başlanacağı planlaşdırılıb. İşlər üç il ərzində başa çatdırılacaq", - mənbə qeyd edib.
Bundan əvvəl tərəflər 235 milyon dollar dəyərində Azərbaycan paytaxtında ARDNŞ üçün yeni inzibati binanın tikilməsi haqqında saziş imzalayıblar. Tikintinin 32 ay ərzində başa çatdırılması planlaşdırılıb.
Binanın dizaynı Cənubi Koreyanın "Heerim Architects" şirkəti tərəfindən hazırlanıb.
ARDNŞ artıq yeni inzibati binanın tikintisi məqsədilə Heydər Əliyev prospektində ərazi alıb.
Yeni inzibati binada bir neçə konfrans-zal, qonaq otaqları, kompakt sosial-məişət obyektləri, yeraltı və yerüstü avtomobil dayanacaqları, avtonom texniki məntəqələr və idman qurğularının olması nəzərdə tutulur. Binanın hündürlüyü 149,4 metr təşkil edəcək. Bina iki yeraltı və 35 yerüstü mərtəbəyə malik olacaq.