Azərbaycan, Bakı, 30 avqust /Trend, müxbir T.Cəfərov/
İran və Azərbaycanın enerji idarələri nümayəndələrinin birgə iclası sentyabrın ortalarında Bakıda keçiriləcək. Bunu İranın neft nazirinin qaz məsələləri üzrə müavini Cavad Uci deyib. Məlumatı İranın Neft Nazirliyinin rəsmi xəbər saytı SHANA yayıb.
Ucinin sözlərinə görə, birgə iclasda İranın Azərbaycandan 5 milyard kubmetr qaz alması məsələləsi müzakirə olunacaq. "Hazırda Milli Qaz Şirkəti Azərbaycanla yazışma işlərini aparır. Ramazan ayından sonra İranın nümayəndə heyəti Bakıya rəsmi səfər edəcək və əgər Azərbaycan tərəfi qaz həcmini artırmaqda maraqlı olsa, İran bunu alqışla qarşılayacaq", - Uci deyib.
Onun sözlərinə görə, şirkət qazın alışı və satışı siyasətini icra edir. Hazırda bütün müqavilələr bu istiqamətdədir, lakin təkcə Azərbaycandan qazı Naxçıvana tranzit edir.
Hazırda İrana qaz tədarükünün artırılması üçün ARDNŞ Astaradakı qaz-kompressor stansiyasının gücünün genişləndirilməsi üzrə işlər aparır. Azərbaycandan İrana gedən qaz kəmərində də təmir-bərpa işləri aparılacaq. Payıza planlaşdırılan bu işlər başa çatdıqdan sonra uzunmüddətli qaz tədarükü ilə müqavilənin bağlanması və qaz həcminin sutkada hazırkı 1,2 milyon kubmetrdən 3-3,5 milyon kubmetrdədək artırılması nəzərdə tutulub. Azərbaycan Naxçıvan Muxtar Respublikasının svop əməliyyatları çərçivəsində qazla təmin edilməsi üçün İrana qaz tədarük edir. Çünki NMR Ermənistanın Azərbaycan ərazilərinin 20 faizini işğal etməsi nəticəsində blokada şəraitindədir.
Azərbaycan və İranı ümumi uzunluğu 1474,5 kilometr olan - 296,5 kilometri Azərbaycan ərazisində yerləşən Qazı Məhəmməd-Bind-Biand qaz kəməri əlaqələndirir. Bu boru kəmərinin layihə üzrə ötürücülük qabiliyyəti ildə 10 milyard kubmetr təşkil edib. Bu marşrut 1971-ci ildə istismara verilən Qazax-Astara-İran boru kəmərinin qoludur. Bu istiqamətində üç kompressor stansiyası - Qazı Məhəmməd, Ağdaş və Qazax stansiyaları tikilib. Qaz nəqliyyatı sistemi 55 atmosfer təzyiqi gücündə nəzərdə tutulub. Boru kəmərinin diametri 1200 millimetridir.