Azərbaycan, Bakı, 25 oktyabr /Trend, müxbir E.İsmayılov/
Azərbaycan və Türkiyə arasında avqustda imzalanan strateji əməkdaşlıq və qarşılıqlı yardım haqqında saziş çərçivəsində birgə enerji komissiyası yaradılacaq. Bu barədə bazar ertəsi Trend-ə Türkiyənin Azərbaycandakı səfiri Hulusi Kılıc deyib.
Onun sözlərinə görə, komissiya iki ölkə arasında enerji əməkdaşlığının daha da inkişaf etdirilməsi məqsədilə yaradılacaq.
"Bakı-Tbilisi-Ceyhan neft kəməri və Bakı-Tbilisi-Ərzurum qaz kəməri Azərbaycan və Türkiyənin enerji təhlükəsizliyinin təminində böyük rol oynayır", - Kılıc qeyd edib.
"Azərbaycan Türkiyə ərazisi vasitəsilə dünya bazarına həm beynəlxalq, həm də Avropanın enerji təhlükəsizliyi baxımından böyük əhəmiyyətə malik qaz ehtiyatlarını çıxarır", - Kılıc bildirib.
Onun sözlərinə görə, hazırda Azərbaycan qazının Türkiyə ərazisi ilə nəqli üçün istiqamət və alıcıların seçilməsi üzrə danışıqlar davam etdirilir.
"Şahdəniz" yatağının işlənməsinin ikinci fazası çərçivəsində Azərbaycan qazının Avropa bazarına çıxışı Azərbaycan və Türkiyə əməkdaşlığının növbəti uğuru olacaq, eləcə də Azərbaycanın gələcək inkişafına öz töhfəsini verəcək", - Kılıc deyib.
Bundan əvvəl Türkiyə və Azərbaycan qaz sahəsində iki ölkə arasında əməkdaşlığın əsas istiqamətlərini müəyyən edən sənədi imzalayıblar. Sənədlər "Şahdəniz" yatağının işlənməsinin birinci və ikinci fazaları çərçivəsində Azərbaycan qazının qiymətini, eləcə də qazın Türkiyə ərazisi vasitəsilə tranzit şərtlərini nəzərdə tutur.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%. "Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
Hazırda qaz Gürcüstan və Türkiyəyə Cənubi Qafqaz qaz kəməri ilə nəql olunur.
"Şahdəniz" yatağında bu ilə proqnozlaşdırılmış hasilat 7,84 milyard kubmetr qaz təşkil edir. Yataqda ən yüksək hasilat həddi 8,6-9 milyard həcmində nəzərdə tutulur. Proqnozlara əsasən, yatağın işlənməsinin ikinci mərhələsi çərçivəsində burada qaz hasilatı ildə 25 milyard kubmetrə çatdırıla bilər.