Azərbaycan, Bakı, 7 oktyabr /Trend müxbir T.Cəfərov/
İran Neka-Cask boru kəmərinin tikintisi üçün Cənubi Koreya şikrəti ilə əməkdaşlıq müqaviləsi imzalayıb. Bu barədə Trend İranın pananews.ir saytına istinadən məlumat verir.
1680 kilometrlik neft boru kəməri İranın Xəzər dənizi sahilində yerləşən Neka limanından Fars körfəzi sahilində yerləşən Cask limanınadək çəkiləcək.
MEHR agentliyinin məlumatında bildirilir ki, İranın Neka limanından Cask limanına neft boru kəmərinin çəkilməsi layihəsinin reallaşdırılması üçün 5 ildir ki, müxtəlif xarici şirkətlərlə danışıqlar aparılır. Həmin boru kəməri vasitəsi ilə İran Xəzəryanı ölkələrin neftinin Fars körfəzi ölkələrinə nəqlini nəzərdə tutur.
Bundan öncə İran həmin boru kəmərinin inşası üçün Rusiya və Çin şirkətləri ilə də müzakirələr aparıb.
Boru kəməri vasitəsi ilə sutkada bir milyon barel neftin Xəzəryanı ölkələrdən Fars körfəzi ölkələrinə nəqli nəzərdə tutulur. Boru kəmərinin tikilməsi üçün 3,3-3,7 milyard dollar sərmayə yatırılmalıdır.
Bundan öncə İranın neft nazirinin müavini və Milli Neft Emalı Şirkətinin direktoru Nurəddin Şahnazizadə Neka-Cask boru kəmərinin reallaşdırılması və yeni neft emalı zavodlarının tikintisi üçün kifayət qədər maliyyə dəstəyi olmadığını və boru kəmərinin tikintisi üçün müxtəlif xarici şirkətlərlə danışıqlar aparıldığını demişdi.
İranın Neft Nazirliyinin hesablamalarına görə, Neka-Cask boru kəməri 2013-cü ildə istifadəyə verilməlidir.