Azərbaycan, Bakı, 23 aprel /Trend, müxbir E.İsmayılov/
Azərbaycan Respublikası Dövlət Neft Şirkəti (ARDNŞ) Azərbaycanın "Şahdəniz" dəniz qaz-kondensat yatağının işlənməsi layihəsində Fransanın "Total" şirkətinin payını əldə etməkdə maraqlıdır. Trend-in məlumatına görə, bunu çərşənbə günü jurnalistlərə ARDNŞ-in iqtisadi məsələlər üzrə vitse-prezidenti Süleyman Qasımov deyib.
Onun sözlərinə görə, bu, "Total"ın payını satmağa hazır olacağı təqdirdə mümkündür.
S.Qasımov qeyd edib ki, "Total"ın layihədə iştirak payını satmaq niyyəti rəsmən təsdiqlənməyib: "Bu niyyət rəsmən təsdiqlənsə, payı əldə etmək hüququ ilk növbədə müqavilə iştirakçılarına, o cümlədən ARDNŞ-yə məxsusdur".
Vitse-prezident bildirib ki, Türkiyə tərəfi də layihədə bu payı əldə etməyə maraq göstərir: "Lazımi vəsait olarsa, daha doğrusu, dövlət vəsait ayırarsa, ARDNŞ də layihədə payını artıra bilər".
Qeyd edək ki, 1996-cı il iyunun 4-də "Şahdəniz" qaz-kondensat yatağının işlənməsinə dair müqavilə imzalanıb. Yatağın təsdiq edilmiş ehtiyatları 1,2 trilyon kubmetrdir.