Azərbaycan, Bakı, 9 iyul /Trend, müxbir Emil Hüseynov/
Azərbaycan Respublikası Dövlət Neft Şirkətinin (ARDNŞ) "Azəriqaz" İstehsalat Birliyi (İB) yanvar-iyun aylarında 89 çoxmərtəbəli binanı təbii qazla təmin edib. Bu barədə Trend-ə Birlikdən məlumat verilib.
"Azəriqaz" İB qazın Azərbaycan ərazisində istehlakçılara paylanması və satışı ilə məşğuldur.
Ötən illərə nisbətən Azərbaycanda çoxmərtəbəli binaların qazlaşdırılması prosesi sürətlənib.
"Azəriqaz"dan qeyd ediblər: "Biz 89 binanı qazlaşdıraraq 8273 mənzili əhatə etmişik".
2013-cü ildə Azərbaycanda 149 çoxmərtəbəli bina qazlaşdırılıb, 2012-ci ildə isə bu göstərici 60 bina təşkil edib. Qazlaşdırılmış binaların böyük hissəsi Bakının payına düşür.
2014-cü il iyunun 1-nə olan vəziyyətə görə, Azərbaycanda qaz operatorunun abonentlərinin sayı 1 695 552 təşkil edib ki, bunun da 717 179-u Bakının, 978 373-ü isə digər bölgələrin payına düşür.
