Hazırda Azərbaycan Beynəlxalq Əməliyyat Şirkəti (ABƏŞ) "Çıraq" neftçıxarma platformasında iyulun 14-də baş verən elektrik kəsilməsinin son səbəblərini müəyyənləşdirir. ABƏŞ-in operatoru "BP Azərbaycan" şirkətindən Trend ə verilən xəbərə görə, platformanın enerji təchizatı iyulun 15-də bərpa edilib, lakin platformada neft hasilatı hələ başlanmayıb.
Platformanın enerji təchizatı iyulun 14-də saat 15:30-da sistemin siqnalı ilə dayandırılmışdı. Platforma elə layihələndirilib ki, belə hallarda bütün əməliyyatlar avtomatik olaraq söndürülür və obyekt tamamilə təhlükəsiz olur. Platformadakı əsas olmayan heyətin evlərinə aparılması barədə qərar qəbul olunub. Beləliklə, platformadakı 123 nəfərdən 68 nəfər oradan aparılıb.
Baş verənlər "Mərkəzi Azəri" və "Qərbi Azəri" platformalarında neft hasilatına, boru kəmərləri ilə neft ixracına və Səngəçəldəki terminalın işinə heç bir təsir göstərməyib.
Hadisənin səbəblərindən biri belədir ki, sistem, platformada təhlükəsizlik texnikasının təkmilləşdirilməsi üzrə keçirilən tədbirləri həqiqi tədbir kimi qəbul edib.
Yanvar-iyun aylarında ABƏŞ 2005-ci ilin yanvar-iyun aylarında hasil edilən 3,492 milyon ton ilə müqayisədə "Çıraq" yatağından 3,703 milyon ton neft hasil edib. 2006-cı ilin iyun ayında "Çıraq"dakı neft hasilatı 2006-cı ilin may ayındakı 642,29 min tonla müqayisədə 618,853 min ton təşkil edib.
