Bu gün Azərbaycana yeni sərmayələr lazımdır. Bu, ölkənin sürətli templərlə inkişaf etməsi və böyük təbii ehtiyatlara malik olması ilə izah olunur. Bu barədə Trend ə Koreya Milli Neft Korporasiyasının (KNOC) nümayəndəsi Qil Yunq Voo bildirib.
KNOC texniki qrupu BP şirkətinin nümayəndələri ilə görüşüb və Xəzərin Azərbaycan sektorunda "İnam" layihəsi üzrə texniki məlumatlar əldə edib (Koreya tərəfi Azərbaycan Dövlət Neft Şirkətinin əlli faizlik payının 20%-ni almaq iddiasındadır. ARDNŞ-dən başqa bu layihədə BP-25% və Shell -25% payla iştirak edir).
Koreyanın neft şirkətinin nümayəndəsi qeyd edib ki, Koreya mütəxəssislərinin keçirdiyi texniki məlumatların qiymətləndirmələrinə görə, "İnam"ın perspektiv strukturunda neft ehtiyatları çox yüksəkdir, lakin bu halda yatağın işlənməsini böyük risklər təqib edir. KNOC ARDNŞ-ə bu layihədəki ehtiyatları yenidən qiymətləndirməyi təklif edib.
Həmçinin Koreya korporasiyası Dövlət Neft Şirkətinə Qazaxıstan və Türkmənistandakı layihələrdə birgə iştirak etməyi təklif edib. Xüsusilə də, söhbət boru kəmərinin tikintisindən gedir. KNOC nümayəndəsi qeyd edib ki, bu layihələrin həyata keçirilməsi üzrə baza Bakıda yerləşə bilər.