Ukrayna prezidenti Viktor Yuşenkonun sentyabrın 7-8-də Bakıya səfəri zamanı Azərbaycan Dövlət Neft Şirkəti (ARDNŞ) və Ukraynanın Dövlət şirkəti "Ukrnafta" arasında "Əməkdaşlıq haqqında" memorandumun imzalanacağı güman edilir. Trend xəbər verir ki, bu barədə ARDNŞ-dən bildirilib.
ARDNŞ-də qeyd ediblər ki, Azərbaycan tərəfi Ukraynaya neft məhsulları tədarük etməyə hazırdır, lakin məhsullar Aralıq dənizi bazarındakı qiymətlər üzrə göndəriləcək. "Azərbaycan xüsusi olaraq Ukrayna üçün qiymət təyin etməyəcək. Bu halda, Ukraynaya neft məhsulları həm Bakıdan, həm də Gürcüstanın Batumi limanından təklif oluna bilər", - deyə ARDNŞ nümayəndəsi bildirib.
Lakin ARDNŞ-də hesab edirlər ki, neft məhsullarını Rusiyadan almaq Ukrayna üçün daha sərfəlidir, çünki Rusiyadan gələn məhsulların nəqliyyat xərcləri aşağı olduğundan, onların qiyməti Azərbaycanın məhsullarından aşağıdır.
Azərbaycan kapitalından istifadə etməklə, Ukraynada NEZ-in tikilmə ehtimalına gəlincə, ARDNŞ-də bildiriblər ki, bu məsələ gündəlikdə qalmaqdadır. "Biz Ukrayna tərəfindən daha konkret təkliflər gözləyirik. Əgər biz neftimizi ixrac etsək və neft məhsullarını dotasiya qiymətləri ilə satsaq, nə əldə edərik? Bir sual da var: biz NEZ-də hansı nefti emal edəcəyik? Əgər biz ukraynalılarla birgə zavod tiksək, ən yaxşısı bu nefti Avropanın mərkəzinə qədər çatdırmaq, orada emal etməkdir, o zaman biz daha çox gəlir əldə edəcəyik", - deyə ARDNŞ nümayəndəsi bildirib.