Azərbaycanın Sənaye və Energetika Nazirliyi 2006-2007-ci illərin payız-qış dövrünün sonuna qədər enerji daşıyıcıları ilə təchizat prosesinə nəzarət edəcək. Bu barədə Trend ə Azərbaycanın sənaye və energetika naziri Natiq Əliyev məlumat verib.
"Azərbaycan Dövlət Neft Şirkəti, "Azəriqaz" və "Azərenerji" səhmdar cəmiyyətləri, digər idarələr kimi, fəaliyyət proqramına malikdir və həmin proqramlar üzrə 2006-2007-ci illər in payız-qış dövrünə hazırlıq çərçivəsində tədbirlər həyata keçirilir. Lakin biz payız-qış dövrünə hazırlığı real şəkildə qiymətləndirməliyik", - deyə o bildirib.
Nazirin sözlərinə görə, elektrik enerjisi ilə təchizatda başlıca problemlərdən biri - paylaşdırma şəbəkələrinin vəziyyətidir. "Paylaşdırma şəbəkələri pis vəziyyətdədir. Onları dərhal dəyişmək olmaz. Yarımstansiyalar, transformatorlar və digər avadanlıqlar yeniləşməlidir", - deyə nazir vurğulayıb.
Nazir hesab edir ki, problemlərin həlli üçün üç istiqamətdə fəaliyyət göstərmək lazımdır. Bu - işin təşkil edilməsi, məsuliyyət, texniki və maliyyə imkanlarıdır.
