Azərbaycan Dövlət Neft Şirkəti (ARDNŞ) ilin sonunadək Bakı-Novorossiysk boru kəməri ilə neftin Ural növünün nəqlini ayda 250 min ton səviyyəsində saxlamağı planlaşdırır. ARDNŞ-dən Trend ə verilən xəbərə görə, Azərbaycan Beynəlxalq Əməliyyat Şirkəti (ABƏŞ) "şimal" marşrutu ilə ayda 80 min ton neft ixrac etməyi planlaşdırır.
BTC Co artıq Bakı-Tbilisi-Ceyhan boru kəmərinin 50% gücündən istifadə edir - sutkada 500 min barel neft. ABƏŞ AÇG blokunda çıxarılan nefti BTC, Bakı-Supsa boru kəməri, "şimal" marşrutu və Azərbaycan-Gürcüstan dəmir yolu ilə Batumi limanına nəql edir.
Oktyabr ayında ARDNŞ Novorossiysk limanından iki tanker partiyası ilə 220 min ton neft yükləyəcək - 85 min ton Vitol treyderi üçün (sentyabrın sonundan keçən partiya) və REOC Ltd treyderi üçün 135 min ton.
İlin əvvəlindən ARDNŞ tenderlərdə Novorossiysk limanından 11 tanker partiyası ilə 979 min ton Ural nefti satıb. Bu həcmdən 456 min ton nefti (6 tanker partiyası) Glencore treyderi alıb. İkinci yerdə 220 min ton neft alan REOC Ltd. treyderidir, Taurus Petroleum 140 min ton, Vitol - 85 min ton, Select Energy - 78 min ton neft alıb.
2005-ci ildə ARDNŞ Novorossiysk limanından 1,631 mln. ton neft yükləyib, 2004-cü ildə isə bu göstərici 2,559 mln. ton təşkil edib.
