Azərbaycan, Bakı /müx. Trend S.Əliyev/ "Azəriqaz" qapalı səhmdar cəmiyyəti abunəçilərinin 96-97 faizi üçün fərdi qaz sayğacları quraşdırıb. "Azəriqaz"dan verilən məlumata görə, hazırda abunəçilərin ümumi sayı 1 milyondur.
Qaz istehlakı həcminin azalmasına baxmayaraq ödəmələrlə bağlı problemlər qalmaqda davam edir. Dörd ayın nəticələrinə əsasən, ödəmələr 48 faiz təşkil edib. Apreldə isə müvafiq rəqəm bir qədər artaraq 60 faizə çatıb.
Hazırda "Azəriqaz" Gəncədə smart-kartlarla (öncədən ödəmə) işləyən yeni qaz sayğaclarının tətbiqinə dair pilot layihəsini həyata keçirir. Əgər bu layihə müsbət nəticələr versə, analoji sistemlər Bakı, Sumqayıt və digər şəhərlərdə də tətbiq ediləcək. Bu şəhərlərdə istifadədən çıxarılmış sayğaclar isə respublikanın bölgələrinə göndəriləcək.
Yeni sayğacların quraşdırılmasının dəyəri 144 manatdır. Sayğacın öz qiyməti isə 138 manata bərabərdir.
