Azərbaycan, Bakı / Trend , müxbir S.Babayeva/ Rusiya və Azərbaycan 2008-ci ildə rabitə və informasiya texnologiyaları sahəsində hökumətlərarası razılaşma imzalamaq barədə razılığa gəliblər. Bu barədə cümə axşamı Azərbaycanın Rabitə və İnformasiya Texnologiyaları Nazirliyindən verilən məlumatda bildirilir.
Razılaşma Bakıda keçiriləcək "Telekommunikasiyalar və İnformasiya Texnologiyaları" sərgi-konfransında imzalana bilər.
Razılaşmanın imzalanması barədə razılıq Azərbaycanın Rabitə Nazirliyinin nümayəndə heyətinin iştirakı ilə Moskvada "Rusiyanın infokommunikasiyaları" mövzusunda keçirilən konfrans zamanı əldə olunub.
Sentyabr ayında Rusiyadan olan nümayəndə heyəti, başda Rusiyanın Rabitə və İnformasiya Texnologiyaları Nazirliyinin beynəlxalq əməkdaşlıq departamentinin direktor müavini Yevgeni Fyodorov olmaqla, Bakıya səfər edib. Səfər zamanı Fyodorov bu razılaşmanın imzalanmasının sürətləndirilməsinin vacib olduğunu qeyd edib.
