Azərbaycan, Bakı, 08 sentyabr/ Trend , müxbir S.Babayeva/Azərbaycan Rabitə və İnformasiya Texnologiyaları Nazirliyinin Dövlət Tezliklər İdarəsinin (DTİ) nümayəndə heyəti çərşənbə günü Almaniyaya yola düşəcək, - bazar ertəsi nazirlikdən bildiriblər.
Hamburq və Münhendə keçiriləcək görüşlərdə Azərbaycanda radiomonitorinq sisteminin təşkili məsələsi müzakirə ediləcək və Almaniyanın bu sahədəki təcrübəsi öyrəniləcək.
Azərbaycanlı mütəxəssislərin səfəri sentyabrın 16 - dək davam edəcək.
2008-ci ilin sonunadək Azərbaycan ölkənin efir məkanını qorumağa imkan verəcək milli radiomonitorinq sisteminin quraşdırılması üzrə şərt və təklifləri müəyyənləşdirməyi planlaşdırıb.
DTİ-də hesab edirlər ki, bu sistemin yaradılmasına, orta hesabla, $15-20 mln. və bir neçə il lazım olacaq.
Sistem vasitəsilə tezliklərin səmərəli istifadəsinin, elektron vasitələrin qeydiyyatı və uçotu, qeydiyyatdankənar istifadənin qarşısının alınması, efir üzərində nəzarət, efir müdaxiləsinin qarşısının alınması təmin ediləcək.
Əvvəllər DTİ-nin rəhbəri Əflatun Məmmədovun verdiyi məlumata görə, layihə həm idarənin daxili vəsaitləri, həm də dövlət büdcəsi hesabına reallaşacaq. Texniki kreditin cəlb ediləcəyi də istisna edilmir.
