Azərbaycan, Bakı, 2 noyabr /Trend, müxbir H.Vəliyev/
Azərbaycan peyk şəbəkələrinin koordinasiya prosedurunu sadələşdirməyi təklif edib. Bu barədə çərşənbə axşamı Trend-ə Azərbaycan Rabitə və İnformasiya Texnologiyaları Nazirliyinin Dövlət Radiotezliklər İdarəsindən (DRİ) deyiblər.
Koordinasiyanın əsas məqsədi gələcəkdə abonentlərdə problemlərin yaranmaması üçün bəzi məsələlərin vaxtından əvvəl həll edilməsidir.
İşçi qrupunun iclası çərçivəsində 21,4 və 22 GHz ayrılması ilə yanaşı, peyk rabitəsi üçün əlavə tezliklərin verilməsi məsələsi də müzakirə edilib. Avropanın CEPT təşkilatı 21,4 və 22 GHz-dən əlavə 24 GHz diapazonunun ayrılmasını da təklif edib.
İndi 21,4 və 22 GHz diapazonları radiorele və mobil rabitə operatorları xəttlərinə cəlb edilib və onların peyk rabitəsi ehtiyaclarının ödənilməsinə ayrılması dəqiq araşdırmalar və gələcəkdə onların bir-birinə maneçilik törətməməsi üçün xüsusi kriteriyaların ayrılmasını tələb edir.
İşçi qrupunun iclasında analoq televiziyadan rəqəmsal televiziyaya keçiddə boşalan 790 və 860 MHz tezlik diapazonlarının GSM operatorların ehtiyaclarına verilərək rasional istifadəsi üzrə məsələlər də müzakirə edilib.
Azərbaycan üçüncü nəsil simsiz rabitə (3G) üçün nəzərdə tutulan UMTS (Universal Mobile Telecommunications System) standartına ayırılması üzrə təklifləri dəstəkləyir.
İndi Azərbaycanda bu tezliklər rəqəmsal televiziyanın ehtiyaclarına cəlb edilib. RRB-nin bəzi üzv ölkələrində onlardan mülki aviasiyada da istifadə olunur.
Bu məsələ ilə bağlı son qərarın 2012-ci ildə Beynəlxalq Telekommunikasiya İttifaqının Ümumdünya Radiorabitə Konfransı (ITU - International Telecommunication Union) çərçivəsində qəbul olunacağı gözlənilir.
