Azərbaycan, Bakı, 7 mart /Trend, müxbir T.Cəfərov, H.Vəliyev/
İranın TIC (Telecommunication Infrastructure Company), Omanın "Omantel", Rusiyanın "Rostelekom" və beynəlxalq C&W şirkətləri Asiya və Avropa arasında trafik tranziti üzrə konsorsiumun yaradılması haqqında dördtərəfli saziş imzalayıblar. Məlumatı MEHR agentliyi məlumat verib.
Müqaviləyə əsasən, trafikin tranziti Oman ərazisi ilə İrana, sonradan Azərbaycan, Rusiya və Frankfurtadək (Almaniya) həyata keçiriləcək. Magistralın buraxılış qabiliyyəti 540 Gbit/saniyə təşkil edəcək.
Hazırda Gulf Bridge International (GBI) və TIC şirkətləri tərəfindən İran və Fars körfəzi regionunu Hindistan və Yaxın Şərqlə birləşdirən sualtı optik-lif magistral kabelinin çəkilməsi üzrə işlər aparılır.
Tərəflərin bildirdiyinə görə, GBI və TIC-in sualtı optik-lif magistral kabelinin çəkilməsi layihəsi Azərbaycan, Pakistan, Əfqanıstan, Türkmənistan və s. daxil olmaqla, Mərkəzi Asiya ölkələrinin şəbəkə infrastrukturlarının birləşməsi imkanının təmin edəcək.
GBI kabel magistralı həm regionda, həm də bütün dünyada operator və digər telekommunikasiya şirkətləri üçün rabitənin sabitliyi məqsədilə çəkiləcək. GBI kabel sistemi Fars körfəzi regionunun bütün ölkələrini birləşdirəcək, Avropa və Asiyaya qoşulmanın gələcək artımını təmin edəcək. GBI kabel magistralının saniyədə beş terrabit gücü və 25 ilə qədər istismar müddəti ilə planlaşdırılan təcrübi istismara verilməsi 2011-ci il üçün nəzərdə tutulub.
