Azərbaycan, Bakı, 11 may /Trend, müxbir H.Vəliyev/
Yaxın vaxtlarda Azərbaycanın Rabitə və İnformasiya Texnologiyaları Nazirliyi elektron rəqəmli imzaların verilməsi ilə bağlı təşkilati məsələləri həll edəcək. Bu barədə çərşənbə günü Trend-ə "Ultra" şirkətinin baş direktoru Tahir Mirkişili məlumat verib.
Mirkişilinin sözlərinə görə, texniki nöqteyi-nəzərdən bütün məsələlər artıq həll olunub və bu gün təşkilati məsələlərin həlli aktual olaraq qalır.
Həmçinin yaxın vaxtlarda rəqəmli imzaların dəyəri müəyyən olunacaq.
"Dünya təcrübəsində rəqəmli imzaların qiyməti müxtəlifdir. Bu, əsasən onun hansı müddət üçün alınması, eləcə də onun sahibinin istifadə edəcəyi xidmətlərin sayından asılıdır. Mühüm aspektlərdən biri də rəqəmli imzalardan istifadə üzrə miqdar məhdudiyyətləridir. Bütün sadalananlar elektron rəqəmli imzanın dəyərini müəyyən edir. Avropa ölkələrində bu qiymət 60-120 avro arasında tərəddüd edir", - Mirkişili bildirib.
Elektron rəqəmli imzanın alınması proseduruna gəldikdə, o da istifadəçilərin kateqoriyasından asılı olaraq müxtəlif olacaq. Azərbaycanda rəqəmsal imzaların verilməsi üzrə üç mərkəz fəaliyyət göstərəcək ki, onlardan ikisi dövlət və özəl strukturların xidmətlərini yerinə yetirəcək, biri isə baş mərkəz olacaq.
Mirkişilinin sözlərinə görə, rəqəmli imzanın alınması dövrü Milli Seritikatlaşma Mərkəzinin işinin hansı formada təmin olunacağından asılıdır.
"O, bir həftə, ya da bir gün ərzində alına bilər. Vaxt əsasən sənədlərin, emissiya kartlarının etibarlılığının yoxlanması, PİN-kodun, daha sonra kartın özünün və digərlərinin ənənəvi poçt vasitəsilə göndərilməsi üçün tələb olunur", - o deyib.
İstifadəçi rəqəmli imzadan istifadə etmək üçün kart-riderə və internet-resurs vasitəsilə e-imza.az səhifəsini yükləmək üçün xüsusi proqram təminatına malik olmalıdır. Elə həmin səhifədə elektron xidmətlərin bütün mövcud növləri ilə tanış olmaq mümkündür.
Rəqəmli imzaların əsas üstünlüyü işgüzar münasibət və əlaqələrin elektron formata tam keçidindən ibarətdir. Azərbaycanda rəqəmli imzaların verilməsi infrastrukturu istismara tam hazırdır.
Rəqəmli imzanın əldə olunması təşkilatın internet şəbəkəsi vasitəsilə mübadilə etdiyi sənədin müəllifliyi və məzmunu ilə bağlı əmin olmağa imkan verir. Elektron imzanı saxtalaşdırmaq mümkün deyil. Rəqəmli imza ilə imzalanmış sənəd əllə imzalanmış sənədlə bərabər tutulur.
