Azərbaycan, Bakı, 17 fevral /Trend, müxbir H.Vəliyev/
Azərbaycanın "Bakcell" MMC mobil rabitə operatoru Bakının ictimai yerlərində mobil telefonların enerji yığması üçün cihazlar quraşdıracaq. Bu barədə cümə günü Trend-ə "Bakcell" şirkətindən bildiriblər.
Bu cihazların quraşdırılması martda başlayacaq və onlardan paytaxtın 25 nöqtəsində (ticarət və əyləncə mərkəzləri və s.) istifadə etmək mümkün olacaq.
"Cihazlar eyni vaxtda müxtəlif modeldə olan 6 mobil telefonu enerji ilə doldurmağa imkan verir. İstifadəçilər 5-10 dəqiqə ərzində telefonlarını enerji ilə doldura bilərlər. Telefonların doldurulması üçün cihazlardan istifadə pulsuz olacaq", - şirkətdən qeyd ediblər.
Bundan başqa, cihazlarda bütün zəruri soraq-məlumat, habelə "Bakcell" tarifi və xidmətləri üzrə məlumat təqdim ediləcək.