Azərbaycan, Bakı, 19 aprel /Trend, müxbir H.Vəliyev/
Azərbaycanda piratçılıqla mübarizə və müəllif hüquqlarının müdafiəsi üzrə komissiyanın yaradılması gözlənilir. Bu barədə cümə axşamı Trend-ə Azərbaycanın Müəllif Hüquqları Agentliyindən məlumat verilib.
Komissiyanın Əsasnamə layihəsi müvafiq dövlət orqanları ilə razılaşdırılıb və baxılmaq üçün hökumətə təqdim edilib.
Planlaşdırıldığı kimi, komissiya piratçılıqla mübarizə sahəsindəki fəaliyyətini mərkəzi və yerli icra hakimiyyəti orqanları və bələdiyyələr və təşkilati-hüquqi formasından asılı olmayaraq bütün hüquqi şəxslərlə əlaqələndirəcək.
Hazırda "Piratçılıqla mübarizə və əqli mülkiyyət hüquqlarının müdafiəsi haqqında" qanunun qəbulu gözlənilir. Həmin qanunun qəbulundan sonra nəzarət holoqramları tətbiq ediləcək. Nəzarət holoqramları məhsul istehsalçılarına onların məhdud sayda sorğuları əsasında müəllif hüququ təqdim edəcək. Holoqramsız yayılan məhsul pirat məhsul hesab ediləcək.
Əqli mülkiyyət hüquqlarının təmin olunması məqsədilə hüquq pozuntuları üzrə sanksiyaların sərtləşdiriləcəyi də gözlənilir. Hazırda Agentlik Cinayət, İnzibati Xətalar, eləcə də Cinayət Prosessual və Mülki Prosessual məcəllələrinə müvafiq dəyişikliklər edilməsi barədə təklifi Baş Prokurorluq, Ədliyyə və Daxili İşlər nazirlikləri ilə razılaşdırıb. Təklif baxılmaq üçün Nazirlər Kabinetinə təqdim edilib.
