Azərbaycan, Bakı, 25 iyun /Trend, müxbir H. Vəliyev/
Azərbaycan və Qətər informasiya kommunikasiya texnologiyaları (İKT) sahəsində əməkdaşlığın istiqamətlərini müəyyənləşdirirlər. Bu barədə bazar ertəsi Trend-ə Azərbaycan Rabitə və İnformasiya Texnologiyaları Nazirliyindən məlumat verilib.
İKT sahəsində iki ölkənin əməkdaşlığı Bakıda Azərbaycanın rabitə və informasiya texnologiyaları naziri Əli Abbasovun Qətərin İnformasiya Kommunikasiya Texnologiyaları Ali Şurasının (ictQatar) baş katibi Hessa Sultan əl-Cabirlə keçirdiyi görüşün müzakirə mövzusu olub.
Məlumata əsasən, Qətər ilə əməkdaşlığın əsas istiqamətlərindən biri qismində kosmik sahə nəzərdən keçirilir. Söhbət kommersiya əsasında buraxılışı ilin sonuna gözlənilən "Azerspace" telekommunikasiya peykinin texniki qurğularının Qətər tərəfinin istifadəsinə verilməsindən gedir.
"Nanotexnologiyalar sahəsində iki ölkənin əməkdaşlığının istiqaməti də əsas prioritetlərdən biridir. Bununla əlaqədar baş katibin səfər proqramında, həmçinin Azərbaycan Rabitə və İnformasiya Texnologiyaları Nazirliyinin Yüksək Texnologiyalar üzrə Tədqiqat Mərkəzinə baş çəkmək nəzərdə tutulub. Mərkəzdə bu sahəd tədqiqatlar aparılır", - nazirlikdən bildirilib.
Öz növbəsində Qətər İKT sahəsində nailiyyətlərə malikdir və bu, Azərbaycan üçün faydalı ola bilər.
Görüşün yekunları üzrə tərəflər İKT sahəsində əməkdaşlıq üzrə anlaşma memorandumu imzalayacaqlar.
