Azərbaycan, Bakı, 4 dekabr /Trend, müxbir E.Əliyev/
Bu gün Bakıda keçirilən ticarət və iqtisadiyyat sahəsində ikitərəfli əməkdaşlıq üzrə Azərbaycan-İraq hökumətlərarası komissiyasının birinci iclasının gedişində İraqın gələcəkdə Azərbaycanın "Azerspace-1" telekommunikasiya peykindən istifadəsi məsələsinə baxılıb.
Trend-in məlumatına görə, iclas zamanı rabitə və informasiya texnologiyaları naziri Əli Abbasov qeyd edib ki, Azərbaycan son 10 il ərzində nəhəng inkişaf yolu keçib:
"Ölkənin iqtisadi potensialının göstəricilərindən və bu inkişafın nəticələrindən biri milli telekommunikasiya peykinin orbitə buraxılması oldu".
Nazir əlavə edib ki, "Azerspace" İraqı həm də ona görə maraqlandıra bilər ki, peykin coğrafiyası Yaxın Şərq və Mərkəzi Asiyaya hesablanıb.
Öz növbəsində, İraq tərəfdən komissiyanın həmsədri, əyalət işləri üzrə dövlət naziri Tarhan əl-Müfti İraqın peykdən istifadə etməkdə marağı olduğunu təsdiqləyib: "İraq "Azerspace"in imkanlarına, o cümlədən rabitə, radio və teleyayım sahəsinə maraq göstərir".
