Azərbaycan, Bakı, 1 avqust /Trend, müxbir Emil İsmayılov/
Rabitə və Yüksək Texnologiyalar Nazirliyinin Bakı Telefon Rabitəsi İstehsalat Birliyi (BTRİB) cari ilin II rübünün əvvəlində Rusiyadan müqavilə əsasında 10 240 ədəd IP-ünvan alaraq müvəqqəti də olsa, paytaxtda IP-ünvan çatışmazlığı ilə bağlı problemi aradan qaldırmağa nail olub. Trend-in məlumatına görə, bunu BTRİB-in baş direktoru Beytulla Hüseynov "Rabitə dünyası" qəzetinə müsahibəsində deyib.
Onun sözlərinə görə, yeni quraşdırılan internet platforması 384 min abunəçiyə onlayn rejimdə genişzolaqlı internet xidmətlərindən istifadə, beynəlxalq şəbəkəyə 200 Gbit/s sürətlə qoşulma və IP-ünvan çatışmazlığını aradan qaldırmaq üçün NAT avadanlıqlarını dəstəkləmək imkanı verir.
B.Hüseynov qeyd edib ki, "Bakinternet" xidmətinin qlobal internet şəbəkəsinə qoşulma sürəti ilin əvvəlinə nisbətən 6,5 Gbit/s artırılaraq 36,5 Gbit/s-ə çatdırılıb.