Azərbaycan, Bakı, 19 avqust /Trend, müxbir Hüseyn Vəliyev/
Trans-Avrasiya Super İnformasiya Magistralı (TASİM) layihəsinin iştirakçıları Dünya Bankının (DB) layihənin III alternativ marşrutunun salınması üzrə təklifini bəyəniblər. Bunu çərşənbə axşamı Trend-ə TASİM layihsi üzrə işçi qrupunun rəhbəri Zaur Həsənov deyib.
Onun sözlərinə görə, DB Türkmənistan ərazisi ilə III marşrutun salınmasını təklif edir: "Yeni marşrutun, həmçinin Şərqi Asiya ölkələrini (İndoneziya, Vyetnam və s.) əhatə etməklə Çinə çıxışı var. Həmin regionda internet tutumlara böyük tələbat var".
Layihə üzrə işçi qrupunun rəhbəri qeyd edib ki, bu istiqamətdə işlər çərçivəsində gələcək məqsədlərdən biri yeni marşrutun texniki-iqtisadi əsaslandırılmasını (TİƏ) hazırlamaq olacaq: "Bu istiqamətdə artıq işlər aparılır".
III alternativ marşrutla bağlı məsələ iyulun 11-də Bakıda keçirilmiş TASİM layihəsi iştirakçılarının növbəti görüşünün gündəliyinə daxil edilmişdi.
Z.Həsənov əlavə edib ki, görüşdə sentyabrın 15-dək iştirakçı tərəflərin layihənin biznes modelləri ilə bağlı mövqelərini təqdim edəcəklərinə və trafikin idarə edilməsi, investisiya və gəlirlərin bölüşdürülməsinin necə həyata keçirilməsinə dair qərar qəbul edilib: "Qarşıdakı illərdə Çin və Türkiyə bazarlarının tələbatının artımı perspektivləri öyrəniləcək".
Bütün sadalanan aspektlər TASİM-in tikintisi üzrə prinsipial sazişin bəndlərində qeyd ediləcək. Saziş iştirakçılar arasında razılaşmalar əldə edildikdən sonra imzalanacaq.
Qeyd edək ki, TASİM layihəsinə Rusiya (operator "Rostelekom"), Qazaxıstan ("KazTransKom"), Türkiyə ("TurkTelecom"), Çin ("ChinaTelecom") cəlb edilib. Azərbaycan layihədə Rabitə və İnformasiya Texnologiyaları Nazirliyinin Beynəlxalq Əlaqələr və Hesablaşma Mərkəzi ilə təmsil olunub.
