Azərbaycan, Bakı, 24 oktyabr /Trend, müxbir Hüseyn Vəliyev/
Gəncə Alüminium Zavodunun və Sumqayıt Günəş Panelləri Zavodunun bazasında işıq-diod işıqlandırma (LED Light-emitting diode) mənbələrinin kütləvi istehsalına başlanıla bilər. Bunu cümə günü Trend-ə Rabitə və Yüksək Texnologiyalar Nazirliyinin Yüksək Texnologiyalar üzrə Tədqiqat və İnkişaf Mərkəzindən deyiblər.
Mərkəzin bu müəssisələrdə LED-in istehsalına başlamaq imkanı haqqında təklifi baxılması üçün hökumətə təqdim olunub.
Mərkəzdən qeyd ediblər ki, LED-in istehsalının təşkili məsələləri yüksək səviyyədə müzakirə olunub: "Elm tutumlu iqtisadiyyatın və yeni texnologiyaların inkişafının zəruriliyi, eləcə də bu məhsulun Azərbaycan brendi ilə tətbiqi qeyd edilib".
İşıq-diod işıqlandırma sistemi həm bəzək, həm də ümumi işıqlandırmada (memarlıq nümunələri, küçələr, parklar və magistral yollarda) istifadə etmək üçün nəzərdə tutulub.
İşıq-diod işıqlandırma texnologiyaları enerji baxımından səmərəli və ekoloji təmiz metoddur. Bu işıqlandırma sistemi adi közərən lampalardan fərqli olaraq, istehlak olunan elektrik enerjisini qənaət etməyə imkan verir.
