Bakı. Trend:
Türkiyənin TÜBİTAK UZAY şirkəti tərəfindən yaradılan ilk yerli müşahidə peyki İMECE sürətli xəbər ötürmə, görüntü keyfiyyəti və manevr xüsusiyyətlərinə görə ölkənin ən qabaqcıl müşahidə peyki olacaq.
Trend TurkicWorld-a istinadən xəbər verir ki, bu sözləri Türkiyə prezidenti Rəcəb Tayyib Ərdoğan bildirib.
"Bu gün orbitə göndərdiyimiz səkkiz rabitə peykindən üçü missiyasını uğurla tamamladı. Digər beş peyk isə Türkiyədə aktiv fəaliyyət göstərir", - deyə prezident əlavə edib.
Qeyd edək ki, İMECE peyki bu gün yerli vaxtla saat 10:47- də Amerikanın SpaceX şirkətinin Falcon 9 raketi ilə orbitə göndərilib.
Kosmosa göndərmə prosesi Türkiyə Elmi və Texnoloji Araşdırmalar Şurasının (TÜBİTAK) Ankaradakı Yer izləmə stansiyasında sənaye və texnologiya naziri Mustafa Varank, Prezidentin Strategiya və Büdcə departamentinin rəhbəri İbrahim Şenel, Müdafiə Sənayesi rəhbəri İsmail Demir, Rəqəmsal Transformasiya Ofisinin rəhbəri Ali Taha Koç və TÜBİTAK prezidenti Hasan Mandalın iştirakı ilə keçirilib.
IMECE peyki fevralın 21-də ABŞ-dakı Vandenberq Kosmik Qüvvələri
bazasına göndərilib.
Türkiyənin Milli Müdafiə Nazirliyi və Müdafiə Sənayesi
Rəhbərliyinin koordinasiyası ilə həyata keçirilən layihənin orbitə
göndərilməsi prosesi tamamlandıqdan sonra Türkiyənin Hərbi Hava
qüvvələrinin inventarına daxil ediləcək.
İMECE peykinin daha öncə 11 aprel və 14 aprel tarixində kosmosa göndərilməsi planlaşdırılsa da hava şəraiti ilə bağlı dünən orbitə göndərilmə prosesinə 28 saniyə qalmış təxirə salındı.