Azərbaycan, Bakı, 21 iyun /Trend, müxbir İlkin İzzət/
Bu gün Bakı-2015 birinci Avropa Oyunlarında qadın boksçularımız ilk qələbələrini qazanıblar.
Trend xəbər verir ki, bu gün Kristal Zalda keçirilən yarışlarda Azərbaycan idmançılarından rinqə ilk çıxan boksçumuz Azərbaycanı qadın boksçuların yarışında yüngül çəkidə (57 - 60kq) təmsil edən Yana Alekseyeva olub. O, Avropa Oyunlarındakı ilk döyüşündə 1/8 finalda Finlandiya idmançısı Mira Potkonenlə qarşılaşıb.
Görüşün birinci raundunda təmsilçimiz daha üstün boks nümayiş etdirib. İkinci raundda təmsilçimiz rəqibinə daha çox zərbələr endirməyi bacarıb. Üçüncü raundda da nisbi üstünlük Yananın tərəfində olub. Sonuncu, 4-cu raundda isə rəqibinə şans verməyən təmsilçimiz qələbə qazanaraq 1/4 finala vəsiqə əldə edib.
Xatırladaq ki, srağagünkü döyüşlərdə xanım boksçularımız Anaxanım Ağayeva və Leyla Cavadova rəqiblərinə məğlub olublar.
Qeyd edək ki, bu gün daha 4 boksçumuz növbəti mərhələyə vəsiqə əldə etmək uğrunda mübarizə aparacaq.
Kişi boksçularımızdan isə ilk olaraq rinqə Azərbaycanı yarım-orta çəkidə (69 kq) təmsil edən Pərviz Bağırov çıxacaq. Yarışlara 1/8 finaldan qoşulan idmançımız Moldova boksçusu Vasili Belousla üz-üzə gələcək. Döyüş saat 14:15-də başlayacaq. Qeyd edək ki, püşkə əsasən P.Bağırov 1/16 final mərhələsindən azad olub.
Ondan sonra, saat 15:30-da ağır çəkili (91 kq) boksçumuz Aldulkadir Abdullayev Avropa Oyunlarında ilk döyüşunə çıxacaq. O, 1/4 final mərhələsinə vəsiqə əldə etmək üçün Macarıstan təmsilçisi Adam Hamori ilə mübarizə aparacaq. Püşkə əsasən A.Abdullayev də 1/16 final mərhələsində döyüşlərdən azad idi.
Saat 20:30-da isə təmsilçimiz Kollazo Sotomayor növbəti döyüşünə çıxacaq. Birinci yarım-orta çəkidə (64 kq) çıxış edən Sotomayorun 1/8 finaldakı rəqibi moldovalı Dmitri Qalaqot olacaq. Qeyd edək ki, bundan əvvəlki mərhələdə təmsilçimiz Sloveniya boksçusu Edin Seydinoviçi yarışdan kənarlaşdırmışdı.
Bu gün təmsilçilərimizdən rinqə son olaraq püşkə əsasən 1/16 final mərhələsindən azad edilmiş, Azərbaycanı orta çəkidə (75 kq) təmsil edən Xaybula Musalov çıxacaq. Saat 21:00-da başlayacaq 1/8 final mərhələsindəki döyüşdə o, Fransadan olan boskçu Kristian Mbilli Assomo-Hallier ilə münasibətlərə aydınlıq gətirəcək.