Azərbaycan, Bakı, 26 may / Trend , müxbir K.Zərbalıyeva/ Yevlax Taxıl Kombinatının müdiri bazar günü axşam baş vermiş yol qəzası nəticəsində ölüb.
Mingəçevir şəhər prokurorun köməkçisi Yusif Qocayev Trend -a bildirib ki, axşam saat 21 radələrində Mingəçevir şəhər Polis İdarəsinin yaxınlığında BMW markalı maşınla "Daewoo Nexia" markalı avtomobil toqquşub. Qəza zamanı "Daewoo Nexia" avtomobilində arxa oturacaqda oturmuş Yevlax Taxıl Kombinatının müdiri Firuz Nəsibov hadisə yerindəcə keçinib. Hər iki avtomobildə olan digər şürücülər və sərnişinlər arasında xəsarət alan olmayıb.
Qocayev bildirib ki, mərhumun bədənində heç bir xəsarət izi aşkarlanmayıb. Onun ölümünün səbəbini müəyyənləşdirmək üçün məhkəmə tibb ekspertizası təyin olunub.
Qəzanı törədən digər avtomobilin sürücüsü Səfər Rzayev saxlanılıb.
Faktla bağlı araşdırma aparıldığını deyən Qocayev cinayət işinin açılması barədə yaxın saatlarda qərar veriləcəyini bildirib.
Qeyri-rəsmi mənbələr Nəsibovun sahibkarlıq fəaliyyəti ilə əlaqədar olaraq qəsdən öldürüldüyünü bildirir.
Onun qəzadan öncə təqib olunduğu iddia olunur.
Mərhum Nəsibov Yevlax rayonunun sabiq icra başçısı Rafiq Nəsibovun qardaşıdır.
Müəlliflə əlaqə saxlamaq üçün elektron ünvan - [email protected]