Azərbaycan, Bаkı, 24 aprel / Trend , müxbir A.Hüseynbala /
Azərbaycan dövlətinin iqtisadi gücü artdıqca, dövlət qüdrətləndikcə, maliyyə imkanları genişləndikcə orduya diqqət də daima artır.
"Mənim müşahidələrimə görə, ordumuzda vəziyyət gündən-günə yaxşılaşır", - cümə günü Trend -a "Azərbaycan" qəzetinin baş redaktoru, millət vəkili Bəxtiyar Sadıqov bildirib.
Trend -un arayışı: Ötən ilin oktyabr ayında Azərbaycan ordusunda "dedovşina" faktları aşkarlandıqdan sonra Müdafiə Nazirliyi, millət vəkilləri və QHT nümayəndələrinin təmsil olunduğu orduya ictimai nəzarət qrupu yaradılıb.
İctimai nəzarət qrupu intensiv olaraq hərbi hissələrdə olur, əsgərlərin vəziyyəti ilə maraqlanır.
Azərbaycanın insan hüquqları üzrə müvəkkili (Ombudsman) Elmira Süleymanova öncə Trend -a bildirib ki, işgəncə və "dedovşina" hallarının qarşısını almaq üçün orduya ictimai nəzarətin həyata keçirilməsi vacibdir.
Aprelin 23-də Azərbaycan parlamentinin deputatları Aydın Mirzəzadə, Qənirə Paşayeva, Bəxtiyar Əliyev, Aydın Həsənov, Bəxtiyar Sadıqov, bir qrup KİV nümayəndələri, qeyri-hökumət təşkilatlarının təmsilçiləri cəbhə bölgəsində olublar.
Sadıqovun sözlərinə görə, orduya ictimai nəzarətin bir çox əhəmiyyəti var. "Əvvəla, əsgərlər görürlər ki, onlar tək deyillər, biz vaxtaşırı gəlib onlara baş çəkirik. Bu, onlar üçün ilk növbədə mənəvi dayaqdır", - millət vəkili əlavə edib.
Onun fikrincə, qeyri-hökumət təşkilatlarının, kütləvi informasiya vasitələrinin nümayəndələri əsgərlərin saxlanma şəraitini, qidalanma səviyyəsini görəndən sonra cəmiyyətə həqiqəti çatdırırlar. "Bundan başqa, biz orduda hər hansı nöqsan görəndə bu haqda komandirlərə, Müdafiə Nazirliyinin rəhbərliyinə fikirlərimizi çatdırırq. Beləliklə, hər çatışmazlıq operativ şəkildə aradan qaldırılır", - baş redaktor vurğulayıb.
Millət vəkili deyib ki, son dərəcə vacib olan - orduya ictimai nəzarət bundan sonra da davam edtirilməlidir. "Azərbaycan dövlətinin və xalqımızın əsas güvənc yeri ordudur. Təbii ki, hər bir valideyn min bir zəhmətlə böyütdüyü övladını orduya göndərəndə, onun taleyindən arxayın olmaq istəyir. Orduda xidmət edənlər bizim övladlarımız, qohum-əqrabalarımızdır. Ona görə hər birimiz orduya diqqətimizi əsirgəməməliyik", - Sadıqov qeyd edib.
Məqalə müəllifi ilə əlaqə ünvanı:[email protected]
