Azərbaycan, Bakı, 7 dekabr /Trend, müxbir T.Hacıyev/
Azərbaycan paytaxtındakı yataqxanalarda məskunlaşmış qaçqın və məcburi köçkünlər tezliklə onlar üçün tikilmiş şəhərciklərə köçmək istəyirlər. Bu barədə çərşənbə axşamı Trend-ə Baş nazirin müavini, Qaçqın və Məcburi Köçkünlərin İşləri üzrə Dövlət Komitəsinin sədri Əli Həsənov bildirib.
Komitə sədri bəzi kütləvi informasiya vasitələrində yataqxanalarda məskunlaşmış qaçqın və məcburi köçkünlərin yataqxanalardan köçürülməsinə etiraz etmələri ilə bağlı yayılan məlumatların həqiqətəuyğun olmadığını deyib.
"Yataqxanalardan köçürülməyə etiraz edən adam yoxdur, əksinə, 10 minlərlə qaçqın və məcburi köçkün ərizə yazaraq bu prosesin sürətləndirilməsini xahiş edir. Həmin yataqxanalarda bir otaqda 10-12 nəfər yaşayır. Bu cür yaşayış çox çətindir", - Həsənov vurğulayıb.
Komitə sədri gələn ildən bu prosesin başlanacağını deyib.
İndiyə qədər 100 min qaçqın və məcburi köçkün yeni qəsəbələrə köcürülüb. Bunların 11 mini qaçqın, 89 mini isə məcburi köçkündür.
Azərbaycanlıların Ermənistandan deportasiya olunması və Dağlıq Qarabağ münaqişəsi ilə əlaqədar bir milyondan artıq qaçqın və məcburi köçkün Bakı və ölkənin digər bölgələrində məskunlaşıb.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.