Azərbaycan, Bakı / Trend müxbir S.İlhamqızı/ Demokratik İslahatlar Partiyası (DİP) gələn il Azərbaycanda keçiriləcək prezident seçkisində iştirak edəcək. Bu barədə bazar ertəsi Trend ə DİP-in sədri Asim Mollazadə məlumat verib.
Onun sözlərinə görə, partiyanın prezident seçkisində hansı formada iştirakı məsələsi müzakirə olunur. Bu barədə qərar isə DİP-in qurultayında veriləcək.
Qurultayda DİP-in seçkilərdə iştirak forması, prezidentliyə namizədi açıqlanacaq. Mollazadənin sözlərinə görə, qurultayın bu ilin sonuna qədər keçirilməsi planlaşdırılır. Lakin hazırlıq işləri başa çatdırılmasa, qurultay gələn ilin əvvəlində də keçirilə bilər.
DİP 2005-ci ildə təsis olunub. Partiyanın ideoloji kursu Azərbaycanın Avroatlantik məkana inteqrasiyası, demokratik islahatların aparılması və liberal iqtisadiyyatın formalaşdırılmasından ibartədir. Partiya özünü iqtidara qarşı konstruktiv müxalifət hesab edir. Mollazadə Milli Məclisin deputatıdır.