Azərbaycan, Bakı, 08 fevral / Trend , müxbir S.İlhamqızı/ Azərbaycanın müxalif Milli Birlik Hərəkatı və Liberal Partiyasının lideri hesab edir ki, Azərbaycanda prezident seçkisi ilə əlaqədar ilkin seçki - praymerz keçirilməsi mümkün deyil. "Azərbaycanın bugünkü şəraitində praymerz real deyil və bunun heç mexanizm də yoxdur" cümə günü Trend ə partiyanın lideri Lalə Şövkət bildirib.
Azərbaycanda növbəti prezident seçkisi oktyabrda keçiriləcək. Hakim Yeni Azərbaycan Partiyası indiki prezident İlham Əliyevin növbəti dəfə namizəd olacağını açıqlayıb. Müxalifət düşərgəsindən Müsavat, Ümid, Böyük Quruluş partiyaları öz namizədi ilə iştirak edəcəyini, AXCP, ALP və VİP-in təmsil olunduğu "Azadlıq" bloku isə hələlik seçkini boykot etdiyini açıqlayıb.
Azərbaycan Naminə İctimai Forumun prezidenti, Azərbaycanın Prezident Katibliyinin keçmiş rəhbəri Eldar Namazov Trend ə bildirib ki, müxalifət düşərgəsindən olan namizədlər açıq rəqabətə girməli, onlar arasında ilkin seçki yolu ilə prezidentliyə ən şanslı namizəd müəyyənləşməlidir: "Bu zaman iddialılar öhdəlik götürməlidirlər ki, praymerzin nəticəsini qəbul edəcəklər. Ən şanslı namizədə güzəştə getməyə, ən məntiqli seçim etməyə hamı hazır olmalıdır"-deyə Namazov bildirib.
Müsavat Partiyasının başqanı İsa Qəmbər də Trend ə açıqlamasında bildirib ki, partiyası müxalifətdən olan prezidentliyə namizədlər arasında ilkin seçki keçirilməsinə hazırdır.
Şövkət hesab edir ki, ABŞ-da keçirilən praymerz Azərbaycanda baş tuta bilməz: "Son aylarda biz ABŞ-da keçirilən praymeriz və kokusları müşayiət edirik, bunlar həm Demokrat, həm Respublikaçılar partiyalarının daxilində keçirilən ilkin seçkilərdir. Praymerz prezident seçkisindən bir il qabaq başlayır və Amerikanın bütün ştatlarında aparılır. Namizədlərin təbliğat maşını işə düşür, federal hakimiyyət onlara vəsait buraxır, efir vaxtı verilir, mitinqlər üçün geniş imkanlar yaradılır. Bu gün Azərbaycanda isə praymerz keçirməyə şərait yoxdur"-deyən xanım Şövkət əlavə edib ki, Azərbaycanda müxalifət liderləri rayonlara çıxıb görüşlər, mitinqlər keçirə bilmir, televiziyalara çıxış imkanları yoxdur.
Onun fikrincə, Azərbaycanda müxalifətin siyasi fəaliyyətinə maneələr törədilir. ALP lideri müxalifətin namizədini müəyyənləşdirməkdən daha vacib məsələlərin olduğunu düşünür. Onun sözlərinə görə, müxalifətin əsas hədəfi söz azadlığına qarşı təzyiqləri dəf etmək, həbsdəki jurnalistlərin azadlığa çıxmasına nail olmaqdır. Həmçinin sərbəst toplaşmaq hüququnun bərpa edilməsi, seçki prosesinin iqtidarın monopoliyasından çıxarılması, azad və ədalətli seçkilər üçün normal rəqabət imkanlarının yaradılması ən prioritet məsələlərdir. "Yalnız bunları həll edəndən sonra biz vahid namizəd məsələsini müzakirə edə bilərik"- Şövkət bildirib.
ALP Şövkətin rəhbərliyi ilə 1996-cı ildə yaradılıb. Şövkət 1993-1994-cü illərdə Azərbaycanın dövlət katibi olub. O, hazırda müxalifəti təmsil edən "Azadlıq" siyasi blokunun həmsədridir.