Azərbaycan, Bakı, 08 fevral / Trend , müxbir Q.Cəbiyev/ Azərbaycanın iqtidaryönlü partiyasının üzvləri prezident seçkisində öz namizədi ilə iştirak etmək istəyirlər. "Partiya üzvləri arasında prezident seçkisində namizəd olmağımı istəyənlər var", cümə günü Trend ə iqtidaryönlü Ana Vətən Partiyasının sədri, millət vəkili Fəzail Ağamalı bildirib.
Azərbaycanda növbəti prezident seçkisi oktyabrda keçiriləcək. Hakim Yeni Azərbaycan Partiyası (YAP) indiki prezident İlham Əliyevin növbəti dəfə namizəd olacağını açıqlayıb. Müxalifət düşərgəsindən Müsavat, Ümid, Böyük Quruluş partiyaları öz namizədi ilə iştirak edəcəyini, AXCP, ALP və VİP-in təmsil olunduğu "Azadlıq" bloku isə hələlik seçkini boykot etdiyini açıqlayıb.
Ağamalı deyib ki, 1998-ci il və 2003-cü il prezident seçkilərində də partiya üzvləri onun namizəd olmasını istəyiblər. Lakin o, özü bunu istəməyib. Səbəb isə 1998-ci ildə Heydər Əliyevin, 2003-cü ildə isə İlham Əliyevin daha şanslı namizəd olmasıdır. "Partiya sədri kimi şəxsi maraqlarımı kənara qoymuşam və Azərbaycan üçün daha çox xeyir verə bilən, onu inkişaf etdirmək iqtidarında olan alternativsiz namizədi dəstəkləmişəm" Ağamalı əlavə edib.
Partiya sədri bildirib ki, növbəti prezident seçkilərində də AVP-nin İlham Əliyevin namizədliyini dəstəkləyəcəyi şübhə doğurmur. Onun sözlərinə görə, partiyanın mayın sonlarına planlaşdırılan qurultayında seçkilərdə dəstəklənəcək namizədlə bağlı yekun qərar veriləcək və çox güman ki, AVP üzvləri yekdilliklə İlham Əliyevin namizədliyini irəli sürəcək.
