...

MSK məhkəməyə müraciət etməsə, keçmiş namizədlər borclarını qaytarmaq niyyətində deyillər

Siyasət Materials 8 Aprel 2008 13:18 (UTC +04:00)

Azərbaycan, Bakı, 08 aprel / Trend , müxbir S.İlhamqızı/ Mərkəzi Seçki Komissiyası 2003-cü ildə prezidentliyə namizəd olmuş şəxslərin seçki kampaniyasına dövlət tərəfindən ayrılmış vəsaiti geri almaq üçün məhkəməyə müraciət etməsə, namizədlər pulu qaytarmayacaqlar. Bu barədə Trend a keçmiş namizədlər açıqlama veriblər.

Azərbaycan Mərkəzi Seçki Komissiyasının sədri Məzahir Pənahov bazar ertəsi keçirdiyi mətbuat konfransında bildirib ki, ötən prezident seçkisində MSK-ya borcu qalmış namizədlərə növbəti seçkidə pul ayrılmayacaq.

Azərbaycanın Seçki Məcəlləsinin 191-ci maddəsinə əsasən, dövlət büdcəsindən prezidentliyə namizədlərin seçki kampaniyasına maliyyə vəsaiti ayrılır. Səslərin 3 faizindən azını toplayan namizədlər həmin məbləği sonra MSK-ya, yəni dövlət büdcəsinə geri qaytarmalıdırlar.

2003-cü ildə keçirilmiş prezident seçkisində 8 nəfər namizədin hər birinə indiki yeni manatla 12 min manat (16 min ABŞ dolları) həcmində pul ayrılmışdı. Namizədlərdən yalnız üçü 3 faizlik baryeri keçdi, qalan beş nəfər isə MSK-ya 16 min dollar borclu qaldı.

Pənahov bildirib ki, qanuna əsasən, ötən seçkidə 3 faizlik baryeri keçməyən və borclarını qaytarmayan namizədlər növbəti seçkidə namizəd olarlarsa, artıq bu dəfə onların seçki kampaniyasına dövlət tərəfindən vəsait ayrılmayacaq.

2003-cü ilin prezident seçkisində rəsmi nəticələrə görə, 3 faizdən az səs toplamış namizədlər - Etibar Məmmədov, Sabir Rüstəmxanlı, Qüdrət Həsənquliyev, İlyas İsmayılov və Hafiz Hacıyevdir və onların hər birinin partiyası bu ilin oktyabrında keçiriləcək növbəti prezident seçkisində iştirak barədə qərar qəbul edib, lakin bu şəxslərdən hansının yenə də namizəd olacağı dəqiqləşməyib.

Prezidentliyə keçmiş namizəd Qüdrət Həsənquliyev hesab edir ki, 2003-cü il seçkisində özünün 3 faizlik baryeri keçmədiyi şübhə doğurur. Çünki həmin seçkilərdə 614 seçki məntəqəsinin nəticələri ləğv olunduğu üçün bu, ümumi nəticələrə də təsir göstərib: "614 məntəqənin seçiciləri ölkə üzrə seçicilərin 10 faizdən çoxunu təşkil edir və bu seçicilərin kimə səs verdiyi məlum olmadı. Bu qədər nəticələr ləğv olunmasaydı, namizədlərin, o cümlədən də mənim topladığım səslərdə dəyişiklik ola bilərdi"-deyə Həsənquliyev çərşənbə axşamı Trend a açıqlamasında bildirib.

Onun sözlərinə görə, MSK-nın növbəti seçkidə keçmiş namizədləri dövlət vəsaitindən məhrum etməyə hüququ əsası yoxdur, çünki heç bir qanunda və Seçki Məcəlləsində bu şərt təsbit olunmayıb.

"Seçki Məcəlləsində yalnız o göstərilib ki, 3 faizlik bareyri keçməyən namizədlər pulu geri qaytarmasalar, MSK məhkəməyə müraciət edərək pulun geri ödənilməsinə nail olmalıdır. Əgər MSK bizi məhkəməyə versə və məhkəmə qərar çıxarsa ki, pulu geri qaytarmalıyıq, o zaman qərarı yerinə yetirəcəyik"-deyə Həsənquliyev bildirib.

O, əlavə edib ki, əvvəlki seçkidən qalan borcun növbəti seçkidə namizədlərə ayrılacaq vəsaitə aidiyyatı olmamalıdır.

Digər namizəd İlyas İsmayılov da bildirib ki, 2003-cü ildə seçki saxtakarlıqları olduğu üçün nəticələrlə razılaşmayıb və bu səbəbdən 16 min dolları geri qaytarmağı əsassız hesab edib. İsmayılov da qeyd edib ki, MSK məhkəməyə müraciət edə bilər və yalnız bu yolla ondan həmin məbləği geri ala bilər.

Digər keçmiş namizəd Hafiz Hacıyev isə ümumiyyətlə bu borcu geri qaytarmaq niyyətində deyil. Çünki o, hesab edir ki, həmin vəsait yalnız seçki kampaniyasına sərf olundu, ona görə də hökumət bu pulu geri istəməməlidir: "Bu borca görə növbəti seçkidə vəsait ayırmayacaqlarsa, bu, bizim üçün problem deyil"-deyə Hacıyev Trend a bildirib.

MSK-da isə hesab edirlər ki, keçmiş namizədlər qanunvericiliyin tələblərinə əməl etməli və məhkəmənin müdaxiləsini gözləmədən özləri pulu geri qaytarmalıdırlar: "Keçmiş namizədlərin iddiaları əsassızdır, saxtakarlıqlar olan məntəqələrdə nəticələrin ləğv olunması Azərbaycanda qanunun yaxşı işlədiyini gösərir və 2003-cü ildə 614 məntəqədəki səslərin etibarsız sayılması ümumi nəticəyə təsir göstərmədi"-deyə MSK katibi Natiq Məmmədov Trend a açıqlamasında bildirib.

O, əlavə edib ki, Seçki Məcəlləsinin 197.6-cı maddəsinə əsasən, büdcə borcları olan vətəndaşlar prezident seçkisində namizəd olarsa, seçki kampaniyası üçün dövlət vəsaiti ala bilməzlər.

Seçki Məcəlləsinin 31-ci fəslinin 197-ci maddəsi: "Əvvəlki seçkilər üzrə Mərkəzi Seçki Komissiyası qarşısında büdcə vəsaiti üzrə borcu olan vətəndaşın prezidentliyə namizəd irəli sürüldüyü təqdirdə dövlət büdcəsindən vəsait almaq hüququ yoxdur".

Müəlliflə əlaqə saxlamaq üçün elektron ünvan - [email protected]

Xəbər lenti

Xəbər lenti