Fransa, Strasburq, 07 may / Trend , müxbir A. Məhərrəmli/ Azərbaycanın xarici işlər naziri Elmar Məmmədyarov hesab edir ki, müasir dünyada mədəniyyətlərarası və dinlərarası dialoq beynəlxalq ictimaiyyətin maraq dairəsində olan əhəmiyyətli məsələlərdən birinə çevrilib.
"Sivilizasiyalararası dialoq bu gün dünyada çox vacib hesab edilən məsələ olduğundan, Azərbaycan əməkdaşlığa və mədəniyyətlərarası əlaqələrə böyük önəm verir" - deyə Məmmədyarov çərşənbə günü Strasburqda keçirilən Avropa Şurası Nazirlər Komitəsinin 188-ci Sessiyasında çıxışı zamanı bildirib.
Sessiya barədə Azərbaycanın Avropa Şurasındakı Daimi Nümayəndəliyindən məlumat verilib.
Nazir MəmmədyarovAzərbaycanın üzv olduğu İslam Konfransı Təşkilatı da daxil olmaqla, Avropa Şurası və digər beynəlxalq təşkilatlarla əlaqələrinin genişləndirilməsinin vacibliyini də vurğulayıb.
Nazir çıxışında bu ilin dekabrında Bakıda sivilizasiyaların mədəniyyətlərarası dialoquna həsr ediləcək Avropa Mədəniyyət Nazirlərinin qeyri-rəsmi Konfransının keçiriləcəyini deyib. Bu konfransda Avropa Şurası, İSESCO, ALECSO nümayəndələrinin də iştirak edəcəyini diqqətə çatdırıb.
Nazir Məmmədyarov, Avropa Şurasının Dövlət və Hökumət Başçılarının Varşava Sammitində qeyd edildiyi kimi, Avropanın bəzi regionlarında bu günədək həll edilməmiş münaqişələrin mövcudluğunu vurğulayaraq, bunun narahatedici faktor olduğunu dilə gətirib.
Xarici işlər naziri bu münaqişələrin tezliklə həllinin vacibliyi vurğulayıb, münaqişələrin insanların təhlükəsizliyinə, davamlı inkişafa və tərəflər arasında normal əlaqələrə xələl gətirdiyini deyib.
"Azərbaycanın Dağlıq Qarabağ regionunda mövcud münaqişə ilə bağlı ATƏT-in Minsk Qrupu çərçivəsində aparılan danışıqları rəhbər tutaraq, Azərbaycan beynəlxalq hüququn bütün norma və prinsiplərinə sadiq qalır" - deyə nazir bildirib.
O, diqqətə çatdırıb ki, Ermənistanla mövcud münaqişənin həllinə dair Azərbaycanın mövqeyi - Azərbaycanın işğal edilmiş bütün ərazilərindən Ermənistan silahlı qüvvələrinin çıxarılması, Dağlıq Qarabağın Azərbaycan Respublikasının siyasi, iqtisadi, hüquqi və sosial sistemlərinə reinteqrasiyası, münaqişədən zərər çəkmiş ərazilərin reabilitasiyası, məcburi köçkünlərin öz yurdlarına qayıtması, Azərbaycanın Dağlıq Qarabağ regionunda həm Ermənistan, həm də Azərbaycan icmalarının sülh və harmoniya içində birgə yaşamaları üçün əlverişli mühitin yenidən yaradılması tələblərindən ibarətdir. Bütün bunlara Dağlıq Qarabağın Azərbaycanın daxilində statusunun müəyyən olunacağı halda lazımi şərait yaradılacağı bildirildi.
