Azərbaycan, Bakı, 20 may / Trend , müxbir E.Babayev/ Avropa Şurası Parlament Assambeyasının (AŞ PA) Monitorinq Komitəsinin həmməruzəçisi Yevgeniya Jivkova çərşənbə axşamı Bakıda Milli Televiziya və Radio Şurasının (MTRŞ) sədri ilə görüşdə Azərbaycan dövlət televiziyasında (AzTV) namizədlər üçün pulsuz efir vaxtının ləğv olunması məsələsinə aydınlıq gətirilməsini istəyib. "Görüşdə həmməruzəçiyə bildirdim ki, xarici ölkələrdə bu işi İctimai Televiziya yerinə yetirir və bundan sonra Azərbaycanda da belə olacaq" - görüşdən sonra MTRŞ sədri Nuşirəvan Məhərrəmli Trend -a bildirib.
Seçki Məcəlləsinə əlavə və dəyişikliklər mayın sonunda Milli Məclisdə müzakirə olunacaq. Dəyişikliyə əsasən, dövlət KİV-də seçki təbliğatının aparılması qadağan olunur. Seçki Məcəlləsinin əvvəlki variantında isə, namizədlərə 6 saat pulsuz efir vaxtı ayrılırdı. Bunun 3 saatı AzTV-də, 3 saatı dövlət radiosunda həyata keçirilirdi.
Məhərrəmli bildirib ki, həmməruzəçi ictimai və özəl yayımçılar tərəfindən siyasi reklamın yayımlanmasına dair qanunvericilikdə mövcud olan maddələrlə də maraqlanıb. "Pulsuz siyasi reklam yalnız İctimai Televiziyada həyata keçiriləcək. Özəl telekanallarda isə, bu məsələ "Televiziya və radio yayımı haqqında" qanunvericiliyə uyğun tənzimlənəcək. Hər hansı televiziya bir saat efir vaxtının yalnız 12 dəqiqəsini reklama ayıra bilər. Televiziya istəsə, namizədin reklamını digər reklamların içərisinə yerləşdirə, ya da həmin 12 dəqiqəni bütövlükdə namizədə ayıra bilər. Bu, tok-şoulara, debatlara aid deyil. Namizədlər özəl televiziyalarda tok-şoularda, debatlarda iştirak edə bilərlər" -Məhərrəmli əlavə edib.
Azərbaycanda prezident seçkisi oktyabrın 15-də keçiriləcək.
Məqalə müəllifi ilə əlaqə ünvanı: [email protected]
