Azərbaycan, Bakı, 21 may / Trend , müxbir S.İlhamqızı, R.Hafizoğlu/ ABŞ-dakı erməni lobbisinin Türkiyəyə təzyiq göstərilməsi üçün Konqresə müraciətləri öz növbəsində rəsmi Ankaranın da tələblərini gündəmə gətirəcək. "Əgər erməni lobbisinin təzyiqləri altında ABŞ Türkiyədən Ermənistanla sərhədini açmağı tələb edərsə, o zaman rəsmi Ankara da öz tələblərini irəli sürəcək" - deyə türkiyəli politoloq Sinan Ogan Trend -a açıqlamasında bildirib.
ABŞ-dakı erməni lobbisi Konqresin Aşağı palatasının nümayəndələr məclisinə qərar layihəsi təqdim edib. Sənəddə erməni lobbisi Türkiyənin Ermənistana tətbiq etdiyi embarqoları qaldırması üçün rəsmi Vaşinqtonun Türkiyəyə təzyiq göstərməsini xahiş edir. Qərar layihəsini Demokratlar Partiyasından olan və ermənipərəst kimi tanınan kaliforniyalı deputat Adam Schiff hazırlayıb. Bu haqda məlumatı mayın 18-də Türkiyə KİV-ləri yayıb.
Bu müraciət əslində Türkiyə üçün gözlənilməz deyil, baxmayaraq ki, politoloq Oganın fikrincə, ABŞ Konqresi bu qərar layihəsini qəbul edə bilər. Amma Ogan hesab edir ki, hətta Konqres qərar çıxarsa belə, bunun Türkiyə üçün heç bir əhəmiyyəti olmayacaq.
"Ermənilərin uzun illərdir iddia etdikləri qondarma "erməni soyqırımı" məsələsində də, ABŞ 1915-ci il hadisələrini "soyqırım" kimi qəbul etmədi. Amma ABŞ Ermənistana qarşı embarqoların götürülməsi barədə hansısa qərar çıxara bilər" - deyə politoloq çərşənbə günü İstanbuldan telefon bağlantısı ilə açıqlama verib.
O, əlavə edib ki, Konqresdə ermənilərin xeyrinə qərar layihəsi qəbul olunsa belə, bu, öz növbəsində Türkiyənin də öz tələblərini irəli sürməsinə şərait yaradacaq.
"Türkiyə də Ermənistanın işğal etdiyi Azərbaycan torpaqlarını azad etməsi, Türkiyəyə qarşı əsassız "soyqırım" iddialarından əl çəkməsi tələblərini irəli sürəcək. Ola bilsin ki, ABŞ Konqresində Türkiyəni Ermənistana qarşı embarqolarını götürməyə çağıran qərar çıxarılsın. Amma heç kim Türkiyənin Ermənistanla sərhədlərini zorla açdıra bilməz, bu tələblər qoyularsa, Türkiyə tərəfi də Ermənistanın Azərbaycan torpaqlarını işğal altında saxlaması faktını daha geniş şəkildə gündəmə gətirəcək" - deyən Ogan əlavə edib ki, Konqresdə Ermənistanın xeyrinə sözügedən qərar layihəsi qəbul olunarsa, bu, Türkiyənin ABŞ-la münasibətlərinə mənfi təsir göstərməyəcək.
"ABŞ-da türk lobbisinin siyasi fəallığı artarsa, ermənilərin Türkiyə əleyhinə tələblərinin aktuallığı azala bilər, lakin bu məsələ heç zaman tamamilə ABŞ-ın siyasi gündəliyindən çıxarılmayacaq" - deyə ABŞ-ın Corc Vaşinqton Universitetinin eksrerti, Türkiyənin keçmiş millət vəkili Mərvə Kavakçı Trend -a bildirib.
Kavakcı hesab edir ki, ABŞ-dakı çoxsaylı erməni lobbisi öz fəliyyətlərini gündəmdə saxlamaq üçün bütün fürsətlərdən istifadə edirlər: "Erməni məsələsi isə hər zaman ABŞ-ın siyasi gündəmində qalacaq. Çünki ABŞ prezidentliyinə namizədlər həm indi, həm də seçiləndən sonra erməni lobbisinin dəstəyini almaq məcburiyyətindədirlər" - deyə Kavakçı çərşənbə günü Vaşinqton şəhərindən telefonla bildirib.
O da Konqresdə Türkiyə əleyhinə məsələ qaldırılmasının Vaşinqtonla Ankaranın münasibətlərinə mənfi təsir göstərəcəyini düşünmür: "ABŞ-ın yeni prezidenti seçildikdən sonra rəsmi Vaşinqtonun erməni məsələsinə bu və ya digər formada münasibəti dəyişə bilər. Amma bu, müttəfiq olan ABŞ-la Türkiyənin əlaqələrənə xələl gətirəcək səviyyədə olmayacaq" - deyə Kavakçı bildirib.
Türkiyənin Baş naziri Rəcəb Tayyib Ərdoğan 8 ay əvvəl ABŞ-a səfəri zamanı ermənilərin iddiaları ilə bağlı Türkiyənin güzəştə getməyəcəyini bəyan edib.
Məqalə müəllifi ilə əlaqə saxlamaq üçün elektron ünvan [email protected]